"Ami sei esforsu makaas sei rekomenda ba iha governu atu toma atensaun, liliu ba bee moos iha Dili laran. Ha'u bolu ona Sekretariu Estadu Agua e Saneamentu (SEAS) atu kria ekipa ida tun ba iha terenu haree tok, imi identifika tok problema no kauza ne'e saidan depois mak ita-boot sira halo programa hodi halo manutensaun ba bee iha Dili laran," dehan nia, iha PN, horisehik.
Nia haktuir, kestaun kona-ba bee moos iha Dili, públiku mos labele fo kulpa hotu ba governu, maibe tenke haree ba konxiénsia komunidade nian iha ka lae atu uza bee-moos, see konxiéensia komunidade sira nian iha entaun bee Dili sei sufiente.
Deputadu ne'e haree, bee moos la to'o ba komunidade iha Dili, tanba komunidade laiha konxiénsia utiliza bee, dala-ruma sira loke 24 oras, entaun balun ne'ebe hela iha okos labele asesu ba bee-moos.
"Maibé ha'u fiar katak sira halo hela, ekipa ne'e mos agora tun hela ba iha Bairo-Bairo hodi haree hela kona-ba bee ne'e,"dehan nia.
Antes ne'e, Deputada Bankada FRETILIN, Cristina Dias Quintas hateten, nia parte hala'o vizita ba Aldeia Suhu-Rama ho Becoe, iha Suku Lahane Oriental, Postu Administrativu Na'in Feto, hodi haree rasik ho matan kona-ba tanki ne'ebe governu harii hodi fornese bee moos ba populasaun kuaze maioria iha Dili Laran.
"Maibé neste momentu tanki ne'e taka tiha tanba dehan kondisaun mak seidauk di'ak ou Bee ne'e mak kontaminadu entaun labele fornese, ida ne'e triste tebes tanba populasaun rasik liliu sira hela besik mos labele asesu,"Dehan nia.
Deputada ne'e haktuir, informasaun balun ne'ebe mosu iha media katak governu rasik mos deve hela ADB ho montante millaun $146 atu hala'o projetu bee moos iha Timor-Leste.
Iha alokasaun orsamentu imorestimu ne'e rasik, aloka millaun $121 ba Munisipiu Dili, no Millaun $25 aloka ba iha Munisipiu Baukau atu hala'o projetu bee mos, maibe realidade to'o agora projetu ne'e rasik laiha kontinuasaun tanba prosesu tenderizaun husi Ministeriu Obras Publiku mak leva tempu tebtebes.
Maske situasaun ne'e, hetan ona ejizensia husi parte ADB rasik, maibe nuudar reprezentante povu ejize atu governu rezolve kestaun ne'e, tanba hanesan públiku hotu hatene katak maioria husi populasaun ne'e kuaze %50 seidauk asesu ba bee moos.
"Povu balun ejize bee mos, povu balun kuitadu, konsumu de'it bee husi mota, nomos bee posu, tanba ne'e ha'u husu ba Ministeriu Obras Publika atu toma atensaun ba asuntu ida ne'e,"hakotu nia.
