Prezidente Komisaun E PN, Marcos Xavier hateten, MOP tenke tau atensaun ba estrada urbana ne’ebé kondisaun aat to'o agora seidauk halo normalizasaun.

"Estrada trosu ida Bebonuk ne'e dezeñu Bill of Quantity (BoQ) iha hotu ona, hein de'it implementasaun. Orsamentu foin aprova ne'ebé ita hein uitoan, ba oin Governu sei haree. Tanba ne'e, tama ona orsamentu 2024 nian, la'ós de'it Bebonuk maibé estrada sa'e ba Manleuana no fatin seluk ne'e tama ona prioridade tinan ne'e," dehan nia, iha PN, horisehik.

Iha sorin seluk, Deputadu Bankada PD, Rozenha Martins hateten, preokupasaun estrada diresaun Perumnas, Bairru Pite to'o iha Ailok-Laran. Estrada ne'e rasik populasaun hosi aldeia ualu mak asesu ne'ebé ho kondisaun ne'ebé aat.

"Estrada ne'e la tuir estandar kapitál Dili nian no tinan barak ona la hetan atensaun husi Governu, tanba tuir informasaun ne'ebé hetan mandatu hosi VIII Governu Konstitusionál nian, estrada nia dezeñu prontu ona maibé to'o agora seidauk implementa, nune'e husu MOP atu haree tau atensaun", nia hato'o.

Entretantu, Deputadu FRETILIN, Antonio Calau, hatutan, estrada sira iha Dili laran identifika hanesan iha terminal Tasi-Tolu ba Masilidun ne'e grave tebes, inklui suku Fatuhada no estrada sa'e ba Hera, nune'e husu Governu atu tau atensaun.