Enkuantu, Konsellu Ministrus aprova ona projetu Dekretu Governu, aprezenta husi Ministru Administrasaun Estatál (MAE), Tomás do Rosário Cabral, ne’ebé estabelese remunerasaun ba Prezidente Autoridade Munisipál.

"Diploma ida ne’e tuir prevee ona iha númeru 2 husi artigu 24.º Dekretu Lei númeru 3/2016, loron 16 fulan Marsu, tuir redasaun ne’ebé aprezenta husi Dekretu-Lei númeru 84/2023, loron 23 fulan Novembru, hodi estabelese remunerasaun ba Prezidente Autoridade Munisipál, sira haree ba grau responsabilidade," dehan komunikadu ne'ebé diáriu ne’e asesu horisehik.

Haktuir komunikadu, ne’ebé nu’udar sira-nia responsabilidade no sei fó impulsu ba prosesu desentralizasaun territoriál, ne’ebé sei implika aumentu ba rekursu materiál, orsamentál no umanu ne’ebé sei koloka iha sira nia responsabilidade.

Nune’e, Prezidente Autoridade Munisipál sira ne'e sei iha diretu ba hetan remunerasaun mensál ilíkida ho valór hamutuk US$ 1.750.

Dekretu Governu ida ne’e sei tama iha vigór iha loron tuir mai hafoin ninia publikasaun no sei hahú vigora iha loron 1 fulan janeiru tinan 2024, Revoga ona Dekretu Governu númeru 3/2016, loron 6 fulan Abríl, ne’ebé altera husi Dekretu Governu númeru 20/2021, loron 11 fulan Agostu.