Konsellu Ministrus aprova ona projetu Dekretu Lei, ne’e aprezenta husi Vise-Ministra Solidariedade Sosiál no Inkluzaun (MSSI) Céu Brites, kona-ba alterasaun dahuluk ba Dekretu-Lei númeru 53/2022, loron 20 fulan Jullu, ne’ebé aprova rejime jurídiku ba pensaun sosiál invalidés no ferik-katuas iha ámbitu rejime la kontributivu seguransa sosiál nian.

"Konsellu Ministru aprova kona-ba alterasaun dahuluk ba Dekretu-Lei númeru 53/2022, loron 20 fulan Jullu, ne’ebé aprova rejime jurídiku ba pensaun sosiál invalidés no ferik-katuas iha ámbitu rejime la kontributivu seguransa sosiál nian," dehan komunikadu ne'ebé diáriu ne’e asesu horisehik.

Diploma ida ne’e ho objetivu atu revee formula ba kálkulu montante pensaun nian kada fulan, iha ámbitu rejime la kontributivu ba seguransa sosiál, haree katak, maske valor ida ne’ebé fiksa ona tuir referénsia limite liña pobreza internasionál nian, iha nesesidade hodi halo ajustamentu ida ne’ebé boot liu ba realidade nasionál, liu-liu kona-ba ema ho idade avansadu liu no tanba ida ne’e mós, ho difikuldade asesu ne’ebé boot tebes ba rendimentu sira seluk no ho problema saúde ne’ebé boot liu.

Ho diploma ida ne’e, prestasaun sosiál ida ne’e mós sei la akumula ho rendimentu husi serbisu ba ema hotu no la’ós ba de’it pensionista foun sira, hanesan molok ne’e define ona, sein prejuízu hodi garante direitu ne’ebé hetan ba prestasaun ne’ebé selu ona.

Ho Dekretu lei ne’e, valór diáriu ne’ebé konsidera hanesan valór mínimu hodi moris ho dignidade, ne’ebé Governu prevee ona, tuir liña pobreza no situasaun ekonómika, sa’e ba montante dolar amerikanu $2, ne’ebé rezulta valór mensál dolar amerikanu 60. Aleinde ne’e, sei aumenta valór ida ho dolar amerikanu 20 ba sidadaun sira ho idade husi 70 to’o 79, no dolar amerikanu 40 ba sidadaun sira ho idade 80 liu.