Xefe Suku Bairo Pité Joaninha Alves Soares hatete, planu prioridade atu orienta ba komunidade sira iha Bairo Pité atu hamoos valeta no soe fo’er iha lixu fatin atu mosu inundasaun karik la bele hetan afetadu.
Nia dehan, planu prioridade ne’e, sei tau ba loron 15 agora semana oin iha planu kalendáriu fulan tolu nian hahu husi janeiru, febereiru no marsu, depois ida ne’e sira implementa janeiru semana oin loron 21.
‘’Inundasaun ida foin dadauk akontese ne’e fallansu boot ne’e iha valeta sira ne’e, tanba ne’e ba futuru governu dasia ida ne’e atu hanoin no atu melloria di’ak liu tán liliu ba planu governu dasia nian no planu PNDS nian atu haree liu ba valeta sira ne’ebé mak ninia tampungan no nia volume ne’e la bot, entaun fó prejudika ba bee nune’e fó afeita ba komunidade sira.’’ Dehan Xefe Suku ba jornalista INDEPENDENTE online iha nia knaar fatin Bairo Pité, Sesta, (12/01)
Iha sorin seluk Xefe Suku Mascarinhas, Francisco Lopes hatete, kada fim de semana haruka nia komunidade sira halo limpeza jerál.
“iha sede suku mascarinhas sempre fó orienta ba komunidade sira katak iha loron sabadu sempre halo limpeza ba valeta no iha bairu-bairu” hatete nia.
Nia haktuir, fó hatene bebeik komunidade iha Bairo Altu Balide atu labele ke’e bebeik rai iha rai lolon no labele tesi ai.
“sempre ko’alia ba komunidade sira atu labele tesi ai no ke’e rai lolon sira ne’e, maibé sira nafatin tesi ai no ke’e rai lolon atu halo uma ba, xefe suku hatete hela de’it ba sira maibé sira hatan karik ami la tesi ai no la ke’e rai lolon ne’e ami atu ba hela fali iha ne’ebe, ida ne’e mós bele fó problema boot ida ba xefe suku,’’ akresenta Xefe Suku.
Tanba ne’e, Xefe Suku Mascarinhas husu ba parte governu sentrál liliu Ministériu Obras Públikas nian atu bele tau atensaun, bele karik hadi’a ona fatin sira ne’ebé hetan afeitadu, selae tinan-tinan hetan afetadu bebeik.