Diretóra EBS Faról, Filomena Fátima Belo Freitas hatete, eskola dadaun ne’e menus profesór hamutuk na’in 17, no profesór hirak-ne’e menus dezde VII Governu nia tempu kedas to’o agora tanba iha profesór balun mate no balun moras tan ne’e tan ne’e labele hanorin ona.

Diretora afirma, durante ne’e eskola halo bebeik pedidu ba Ministériu Edukasaun (ME) atu koloka profesór ba iha eskola refere maibé la iha resposta.
“Profesor sira barak mak mate no moras ne’e ami hanorin taka bá mai de’it, maibé agora hapara tan ona entaun dadauk profesór na’in 17 mak menus, no profesór ne’e ba matéria, matemátika, inglés portugés no desportu, matéria ida ne’ebé mak importante ba ezame nasionál,” dehan diretora iha EBS Faról, Kinta (11/01).
Diretora haktuir, eskola EBS Faról durante ne’e halo kontribuisaun ba estudante sira hodi selu ba profesór sira ne’ebé eskola kontrata hodi hanorin estudante sira, maibé iha tinan 2024 ME hasai ona sirkular nu. 262/XII/SE-ESG-ESTV/2023 katak, eskola labele ejize pagamentu osan nian ba kualkér razaun hanesan propinas, farda, materiál no seluk tan.
Tan ne’e iha tinan ida ne’e, iha eskola refere profesór hamutuk na’in 20 mak menus.
Iha fatin hanesan, Diretór Servisu Edukasaun Munispiu Díli (SEMD), Carlito Soares hatete, iha EBS Farol profesor na’in 17 mak menus aumenta ho filiál na’in hitu hamutuk na’in 22.
Diretór haktuir, tan ne’e SEMD halo levantamentu dadus hodi deskobre profesór na’in 250 mak ba asina kontratu no sei hela 670 resin mak hela ba reklamante husi hirak hapara hotu ona ne’ebé ba oin mak hare fila-fali.
“tan ne’e dadaun ne’e voluntáriu sira mos labele hanorin hotu, tanba uluk ita garante inan-aman sira iha eskola fó kontribuisaun bele rezolve problema ida ne’e, maibé iha sikular ME nia la autoriza kualker saida la autoriza atu halo kobransa ba estudante sira,” tenik diretór.
Tan ne’e, diretór esplika, ba problema hira ne’e sei akompaña de’it, tanba ME ona polítika mak sira hapara profesór sira, tan ne’e bainhira ensinu aprendijazem la’o ona mak foin bele hatene.
Enkuatu, iha loron sia fulan-Janeiru 2024, Ministra Edukasaun Dulce de Jesus Soares hatete, kona-ba ba bolsa kandidata iha tempu badak ME hamutuk ho Komisaun Funsaun Públiku (KFP) sei halo teste ba timoroan sira ne’ebé hakarak sai profesór iha Ministériu Edukasaun.
Entretantu, profesór ne’ebé dadaun ne’e hanorin iha EBS Faról hamutuk ho filiál haat hela de’it na’in 59.