Prezidente Komisaun D, Ricardo Baptista hateten, iha duni preokupasaun ba sidadaun ne'ebé mai husi estranjeiru hodi hala'o negosiu iha Timor-Leste.

"Ha'u sente né'e importante atu bele haree par ita mós oinsa atu bele regula ita-nia negosiu sira ne'ebé ema estrajeiru sira halo, depois ita sei haree, maibé mós labele bandu ka taka demais dalan bele fó fali impaktu bá ita-nia rai," dehan Ricardo, iha Parlamentu Nasional, Kinta (27/06).

Tuir nia, sidadaun estrajeiru sira mai Timor-Leste loke negosiu nia impaktu ba Timor-oan sira-nia negosiu ki'ik sira, nune'e Komisaun D sei haree ba ida né'e.

“Maibé ita mós hatene katak Timor-Leste adopta hela sistema merkadu livre, entaun ema bele lori sasan husi fatin hotu-hotu mai, no lei investimentu mós fó dalan ba halo negosiu ho kapital ki'ik.”

"Preokupasaun sira ne’e ami toma nota hela, depois ami sei haree no husi parte CCI-TL mós hato'o preokupasaun ne’e oinsa bele halo alterasaun ba lei investimentu,  tanba ema Xina sira no nasaun barak mak mai halo negosiu ho kapital ki'ik," nia dehan.

Komisaun D, nia hatutan, nota hela atu buka dalan oinsa haree ida ne'e hodi bele buka solusaun no dalan ne'ebé mak di'ak, nune'e Timor-oan sira labele sai vitima ba hala'o negosiu no setor privadu sira bele sente garante ba sira.

Molok ne’e, Deputadu Bankada PD, Armando Lopes hato’o preokupasaun kona-ba situasaun negosiante Timor-oan sira ne’ebé ameasadu tanba negosiante Xineza hahú tama to’o munisipiu sira.

“Aleinde sira faan materia konstrusaun no sira hahú ona faan sasan baziku eceran ka rahun, sei hamate negosiante Timor-oan sira iha ninia fatin, tanba sasan ne’ebé negosiante Xineza sira faan ho presu baratu halo ema hotu halai ba hola iha sira nian, automatikamente hamate negosiante Timor-oan sira nian tanba laiha ema atu ba sosa," dehan nia.