"Halo aprovasaun ba redusaun final ba lei rua, ida mak alterasaun Lei Komisaun Anti-Korupsaun nian aprova ona iha plenaria final globál", dehan Prezidente Komisaun A, Patrocino Fernandes, iha PN, horisheik.
Nia hatutan, Komisaun A kumpre servisu hodi halo ona aprovasaun relasaun ba alterasaun Lei KAK hodi hato'o ba meza Parlamentu Nasional.
Bainhira mak haruka ba Prezidente Republika, nia dehan, ne'e kompotensia Prezidente Parlamentu Nasional, Maria Fernanda Lay, mak bele submete lei ne'e.
Iha fatin hanesan, Vise Ministru Asunto Parlamentar, Aderito Hugo da Costa hateten, Governu sei aprezenta kandidatu foun Komisáriu KAK mai PN bainhira lei númeru 8/2009 altera ona no tama em-vigor durante loron 30.
“Depois aprova PN sei halo redasaun final hodi submete ba Prezidente Repúblika (PR) atu promulga. Depois promulga mak ita foin hatene tuir regra ne’e 30 dias lei ne’e tama em-vigor, Governu sei aprezenta kandidatu Komisáriu KAK,” tenik nia.
Nia hatutan, diskusaun alterasaun lei KAK informa ho Ministru Justisa (MJ), Sergio Hornai, haree ba sirkunstansia funsionamentu normal KAK ne’ebé vakum hela nia komisáriu tinan-ida liu entaun Governu haree, sei la prienxe tempu másimu loron 30, sedu possivel entrada em-vigor IX Governu haree kandidatu ne’ebé atu aprezenta.
Entretantu, iha 22 Abríl 2024, Parlamentu Nasional (PN) liu-husi diskusaun kona-ba proposta Lei numeru 6/VI(1ª) alterasaun daruak ba Lei numeru 8/2009, loron 15 fulan-Jullu, kona-ba Lei Komisaun Anti Korupsaun.
Nune'e, Parlamentu Nasional liuhusi diskusaun faze jenerariedade, espesialidade konsege aprova ona alterasaun lei KAK ho votu a-favor 37 kontra zero abtensaun zero iha final globál.
Tan né'e, Prezidente Parlamentu Nasional husu ba Komisaun A aprova iha redasaun final, nune'e bainhira Prezidente Republika fila husi Portugal sei submete.
