Vise-Reitór Asuntu Akadémika no Garantia Kualidade UNTL, Samuel Freitas hatete, justifikativa UNTL ne’ebé anúnsia husi loron 11 to’o loron 4 fulan-Setembru tinan 2023.
“Sistema Informasaun Rejistu Akadémiku (SIRA) hatudu totál husi estudante rejistadu hamutuk 47,771, entre sira-ne'e, ema na'in-25,021 mak la-ativu ekivalente ho 52,4. Ho simu estudante-foun UNTL nian iha tinan 2024 hamutuk ema na'in-3,487, maka totál estudante UNTL ni’an aumenta hamutuk ema na'in-51,258. Nune’e orienta estudante la-ativu hosi tinan 2000 to’o 2012 ni’an hodi halo regularizasaun matríkula iha UNTL,” Vise-Reitór Asuntu Akadémika no Garantia Kualidade UNTL, Samuel Freitas, liu husi Konferensia Imprensa, iha salaun UNTL, Kuarta (24/04).
Vise Reitór haktuir, kuandu matríkula la-regularizada husi estudante la-ativu sira ba periodu tinan 2000-2012 sei elimina kedas husi Sistema Informasaun Rejistu Akadémiku, hahú husi loron-1 fulan-novembru tinan 2024.
“Eliminasaun dadus sei hala'o teknikamente husi DJSAA liu husi Despaxu Reitor ni’an neʼebé fó-sai espesifikamente ba efeitu ida-ne'e. Re-admisaun ba estudante la-ativu, neʼebé UNTL simu hahú husi tinan 2013 no tuir mai hala'o tuir prosedimentu normál neʼebé previstu iha regulamentu akadémiku UNTL, artigu 8, ho fakuldade sira-ne'ebé nu'udar responsável ba simu pedidu neʼebé verifika iha pontu 4 husi artigu 8 regulamentu akadémiku, no tuir mai lori ba Gabinete VRAAGQ hodi halo validasaun molok haruka ba DGSAA,” Nia hatete.
Nia informa, Faze daruak ba regularizasaun matríkula nian ne'ebé pre-eskrita ka determina ona no tuir mai halo eliminasaun dadus ba estudante la-ativu sira-neʼebé laregularızadu, neʼebé UNTL simu, iha tinan entre 2013 no 2018 tenke hala'o.
Hahú husi fulan-novembru tinan 2024, maibė pedidu re-admisaun ba estudante sira-ne'e sei bele tama ba fakuldade iha kualkér tempu, molok fulan-novembru 2024.
Vise Reitór hatutan, kazu sira-neʼebé la hamosu iha dokumentu ida-ne'e bele rezolve tuir regulamentu akadémiku UNTL ni’an.
“Atrazu husi tempu naruk kona-ba dadus estudante la-ativu sira-ni’an, iha UNTL mak hatudu rekua ka hakiduk ba kualidade akadémika iha sira-nia programa estudu sira, ne'ebé, ida-ne'e tenke rezolve lalais,” Nia relata.
Nia afirma, regulamentu akadémika UNTL ni’an regula rejime pre-eskrisaun, iha artigu 10, maibé kestaun ida-ne'e seidauk aplika dezde tinan akadémiku 2013 hodi rezolve dezafiu sira kona-ba matrikula ka iha pre-eskrisaun, liu-liu ba estudante la-ativu sira.
Nia akresenta, iha fulan-agostu tinan 2022, liu husi ofísiu Sirkulár Reitór nian Nú. 006/UNTL/R/VIII/2022, ho data loron-8 fulan-agostu tinan 2022, kona-ba Orientasaun Jerál sira hodi implementa Rejime Preskrisaun nian iha UNTL, deside hodi fó tempu fulan 18 hodi regula matríkula ba estudante la-ativu sira, liu husi prosesu re-admisaun.
Nia informa, tempu regularizasaun matrikula nian sei termina iha loron-29 fulan-Fevereiru tinan 2024, neʼebé Diresaun Nasional ba Atendimentu Estudante (DNAE) konsege rejista ona la liu husi pedidu readmisaun ba estudante la-ativu hamutuk 410, korresponde ba 1.60%, husi totál estudante la-ativu UNTL ni’an.
“Atu kumpri promesa sira-neʼebé fó-sai ona kona-ba rejime pre-eskrisaun iha tinan 2024, maka UNTL sei ba aplika rejime pre-eskrisaun no tuir mai eliminasaun ba dadus sira-neʼebé la-regularizadu, liu-liu ba estudante la-ativu sira, ne'ebé UNTL simu husi tinan 2000 to'o 2012, neʼebé ho totál ema na in-9.255,” Nia relata.
Nia relata, ne’ebé fahe ba Fakuldade 10 iha UNTL hanesan, Fakuldade Edukasaun 1,328, Enjenária, Siénsia no Teknolojia hamutuk 1,160, Fakuldade Edukasaun Arte no Umanidade 2,796, Fakuldade Medisina, Siénsia Saúde hamutuk 72, Fakuldade Jestaun Ekonómia hamutuk 1,571, Ciências Sociais 1.926, Direito 197, Ciências Exatas 0, Filosofia 15, Turismo, Artes e Indústrias Criativas e Culturais 190.
Iha fatin hanesan, Reitór UNTL, João Martins reforsa, estudante ne’ebé la-ativu sei la hetan sansaun, maibé selu husi nia la-ativu to’o ativa fali iha UNTL.
“Ita mantein ita-nia estatutu, entun sira mós iha obrigasaun no dever atu bele selu propinas fali tempu ne’ebé sira lakon. Agora kona-ba tékniku bainhira estudante mai mak parte estudante akadémika sei haree asuntu ne’e, ida-ne’e ita halo case by case, labele trata jerál,” Nia hakotu.
