Tuir Komisariu Pedro, konfiansa povu Timor-Leste ba instituisaun seguransa ne’e atinze porsentu 95.
"Ligadu ba sasukat konfiansa publiku nian, ha'u hanoin iha tinan haat ba kotuk husi The Asia Foundation halo ona peskiza iha teritoriu nasional hodi fó sai pursentu konfiansa sidadaun nian. Iha momentu ne'ebá ema halo keixa sei menus, maibé agora ema halo keixa kazu violensia domestika barak tebes, tanba ba polisia bele proteze sira."
"Ita bele hatete, oras ne’e daudauk nível konfiansa sidadaun nian ba polisia ne’e boot tebes, 95%, tanba ita hatene katak iha fatin sira mosu problema, sira buka uluk polisia, iha ne’ebé de'it sira buka uluk polisia. Uluk laiha kuandu problema iha, sira la buka polisia, maibé agora sira buka uluk polisia," dehan Komisáriu Pedro, iha programa Meeting Prees ne’ebé realiza husi Sekretáriu Estadu Komunikasaun Sosial hodi koalia kona-ba ‘Polítika Nono Governu, Dezafiu no Dezempeñu PNTL durante ezistensia iha Tinan 25’ iha salaun PCM, Palasiu Governu, Sesta (20/03).
Sasukat konfiansa sidadaun nian ba PNTL to'o 95%, tuir nia, tanba haree ba prezensa atendimentu husi polisia no mós keixa ba kazu sira ne’ebé sempre tama iha polisia.
Komandante Jeral PNTL, Komisariu Jeral Polisia Henrique da Costa, bainhira asume posizaun mai ho prioridade lima ne’ebé foku ba oinsa atu hadia polisia nune’e sidadaun bele fó nafatin konfiansa ba polisia, liu-liu atendimentu publiku sira no bainhira mosu kazu ruma tenke atende lalais no labele haree bá familia no kór partidu.
Uluk, tuir Komisariu Pedro, povu nia konfiansa ba PNTL ladun iha, tan ne’e PNTL hakas an atu bele hadia atu oinsa povu bele buka uluk polisia bainhira sira hasoru problema, maneira ida mak liu husi estabelesimentu Ofisial Polisia Suku (OPS).
"Agora ita estabele OPS iha suku, bainhira sira problema, sira bele kontaktu oinsa atu bele responde sira lalais," dehan nia.
Iha fatin hanesan, Ministru Interior (MI), Francisco da Costa Guterres husu bá sidadaun sira atu kontinua tau fiar ba PNTL atu bele asegura nafatin pas no estabilidade.
"Se iha buat ruma ka iha problema ruma halo favor hato'o ba Komandor Jeral par depois foti medidas ne'ebé mak ajuda hodi hametin pas no seguransa hodi servi povu no rai ida ne'e. Mai ita hotu kontinua fó konfiansa ba polisia atu sira bele halao servisu ho di'ak."
Ministru ne’e mós fiar katak konfiansa povu ba PNTL atinze porsentu 95 tanba kalan sidadaun sira sempre toba dukur no hakmatek, tanba hetan kontrola husi polisia sira iha iha estada no bairo sira.
"Ita kalan toba ho hakmatek, hemu tua iha uma hakmatek, ne'e ema ruma halo hela servisu iha estrada ninin ne’ebá. Kuandu iha tempu Natal ita-boot sira ba missa ho kontente, laiha problema, tanba hetan kontrola husi polisia sira, tanba sira la ba missa, sira la selebra Natal ho familia," dehan nia.
Iha fatin ketak, Diretór Fundasaun Mahein (FM), Nelson Belo hatete, FM seidauk iha mekanismu ka survei ruma atu sukat kona-ba pursentu konfiansa sidadaun nian ba iha PNTL.
Ba konfiansa ne’ebé atinze 95%, Nelson hatete, dala-ruma Komando PNTL iha ninia mekanismu rasik atu sukat grau konfiansa né'e to'o duni pusentu ne’e.
Maske nune’e, tuir Nelson, ida ne’e notisia diak no FM apresia no kontente tebes bainhira porsentu konfiansa ne’e boot duni.
“Se loos signifika iha buat tolu mak akontese: Dahuluk, publiku komesa fi'ar ona ba PNTL katak PNTL bele halao nia kna'ar responsivu. Daruak, bazeia ba lei, publiku hatene ona katak so PNTL mak bele fó solusaun bainhira iha krime ou ameasa ruma ou bainhira iha perturbasaun lei ho orden ruma iha bairo-bairo sira iha komunidade. No datoluk, polisia nia meius atu responde ba publiku ne’e komesa di'ak ona. Ida ne'e signifika katak progresu boot ida ne'ebé mak polisia halo intermus intervensaun no asuntu operasional no aplikasaun lei," deklara Nelson via telefone, Domingu (23/03).
Nia dehan, PNTL bele sasukat konfiansa sidadaun nian, maibé iha lakunas balu ne'ebé publiku kestiona iha parte rodaviariu nian, tanba fatin balu laiha prezensa tranzito nian hodi mosu engrafamentu.
"Ida ne'e mos, ha'u la hatene sai sasukat bá PNTL uza ka la'e, tanba iha fatin bálun iha Dili, kuandu serimonia ruma polisia taka dalan, mosu engrafamentu, entaun polisia bá butuk iha né'eba iha fatin bálun sira laiha", nia reforsa.
"Ami seidauk sasukat ka seiduak iha mekanismu ruma atu sukat kona-bá pursentu 95% konfiansa sidadaun nian. Tanba ami la halo survei sei, maibé ami respeitu no apresia se polisia iha mekanismu rasik kona-ba pursentu 95% né'e kuandu los hotu", katak nia.
Nia hatutan, se karik pursentu 95% konfiansa sidadaun nian bá PNTL né'e los duni maka Fundasaun Mahein hato'o parabéns ba publiku tomak, tanba komesa fó fi'ar bá PNTL.
"Ami nia hare se konfiansa publiku 95% né'e los, entaun publiku iha ona konsiensia bá polisia nia kna'ar, no iha kooperasaun ho polisia hodi hala'o nia knaar ho di'ak, iha aplikasaun lei no protesaun seguransa bá iha komunidade sira iha Dili no Munisípiu sira hotu", nia akresenta.
Nia mos konsidera, membru polisia sira ninia atitude naton ona, tanba né'e maka hetan konfiansa husi publiku.
"Ho nune'e, deklarasaun ne'e fo sai atu bele konquista komunidade hodi fó sira nia opinaun kona-ba instituisaun ninia avaliasaun sira iha komemorasaun ezistensia tinan 25 PNTL nian", nia sublina.
Tuir nia, instituisaun PNTL né'e la'os sira bele servisu iha laran né'e ninia, la'os komandante no membru sira nian, maibé povu nian.
"Entaun signifika katak, povu komesa fi'ar ona ninia instituisaun, ida ne'e konfiansa no motiva sidadaun feto no mane servisu iha instituisaun PNTL", nia esplika.
Nia sujere bá sidadaun hotu atu kontinua nafatin fo fiar nafatin bá PNTL no servisu hamutuk nafatin diak, sai polisia né'ebe mak responsivu no konfiansa no profisional atu servisu tuir lei no ordem ne'ebe aplika iha Timor-leste.
