Primeiru-Ministru simu proposta ne’e akompañadu husi Ministru Administrasaun Estatál, Tomás do Rosário Cabral ho Prezidente Autoridade Munisípiu Manatuto, Luís Inacio Henrique Fernandes no mós Prezidente Autoridade Munisípiu Baucau, Veneranda Lemos.

Jerente Grupu Investimentu Global Stratacom, Peter Wong hateten, empreza ne’e eziste tinan barak ona iha Timor-Leste (TL) ho apoia husi Embaixadór TL iha Brunei-Darrusalam, Abel Guterres no mós Ministru Administrasaun Estatál (MAE), Tomás do Rosário Cabral.

“Investimentu ne’ebé Brunei Darussalam sei halo iha TL liu-liu iha munisípiu Baucau no Manatuto sei haree liu bá turizmu inklui atividade sosiál,” dehan Peter Wong liu husi Komunikandu ne'ebé Online INDEPENDENTE asesu iha Pájina ofisiál Primeiru-Ministru Kay Rala Xanana Gusmão, Segunda (24/03).

Primeiru-Ministru apresia ho aprezentasaun proposta ne’e no fó apoiu bá planu empreza nian, tanba ne’e empreza sei mai fali hodi halo aprezentasaun detallada bainhira iha ona resposta pozitiva hosi Governu maka avansa kedan ho investimentu.

Iha fatin hanesan, Prezidente Autoridade Manatuto, Luís Inacio Henrique Fernandes hateten, investimentu ne’ebé sei halo iha Manatuto iha área turizmu liu-liu hakarak dezenvolve One Dolar Beach no harii Business Park iha Obrato.