Tuir Xefe Departamentu Banku de Sangue, Claudio J. Quintão hatete, objetivu husi alumni estudante husi Dom Bosco oferese raan ba iha Banku de Sangue ne’e, hodi komemora loron Dom Bosco nian ne’ebé monu iha loron 31 fulan-Janeiru ne’e.
“aktividade doasaun ran ne’e hodi komemora loron Dom Bosco nian ne’ebé sei realiza iha loron 31 fulan-Janeiru ne’e, tanba ne’e alumni husi Dom Bosco kuaze 30 resin mak mai oferese sira raan iha ne’e, hodi salva ema seluk nia vida,” dehan nia iha HNGV ba jornalista sira, segunda (29/01).
Nia dehan, Banku de Sangue mós hetan oportunidade hodi envolve mós iha festa Dom Bosco nian, enkaixa mós atividade ida ne’e hodi komemorasaun ne’e, hodi haree ba iha situasaun ne’ebé agora infrenta hela liuliu stock ran ne’ebé menus.
Tanba ne’e, Banku de Sangue sei halo teste laboratorium depois mak bele haree ba iha stock loloos, maibé ema sira ne’ebé mak oferese ran ne’e sira garantia ona ba semana rua ka tolu nian no bele to’o mos ba iha fulan ida .
Nia hatutan, ohin loron iha antigu alunu husi Dom Bosco mak oferese ran no iha mós voluntáriu balun hetan informasaun liu husi média sosiál, entaun sira mós hakarak atu mai halo doasaun ran.
Ba pasiente sira ne’ebé urjente Banku de Sangue sempre rai stock ba iha emerjénsia nian hanesan kazu dezastre operasaun bo’ot no inan isin rua sira ne’ebé partu, no depois de partu, raan fakar makas ne’e Banku de Sangue sempre rai pakote 5 ka 6 ba sira, atu nune’e bele atende situasaun emerjénsia.
Tanba ne’e, Departamentu Banku de Sangue kontinua husu ba populasaun tomak fó ran turuk ida hodi tulun pasiente sira ne’ebé mak agora dadaun pressiza hela ran.
“agora dadaun ita ho númeru familia nian mak aas tebes kada tinan, ne’ebé husi parte Banku de Sangue servisu hamutuk ho kruz vermelha, ami halo ona sosializasaun, ba parte hotu hodi fahe informasaun kona-bá aktividade doasaun ran nian, maibe ita sei hetan numeru voluntariu ne’ebé menus” nia esplika
Nia dehan, kada fulan Banku de Sangue rejista família husi pasiente sira nian hamutuk 3,000 resin no voluntáriu hamutuk 1,000 no dalaruma 900 mai kraik.
Tanba agora dadaun stock ran iha Banku de Sangue iha tipu ran rua ne’ebé disponível hela hanesan tipu ran A no O+, no tipu ran B no AB mak menus hela, ho ida ne’e husu ema hotu atu bele halo kontribuisaun liu husi doasaun ran.
Iha fatin hanesan, membru husi komisaun organizador Dom Bosco, Viriato Mohana Quintas hatete, komemorasaun loron Dom Bosco nian iha aktividade rua mak sira realiza hanesan hadomi ambiente no halo doasaun ran, hodi tulun pasiente sira ne’ebé agora dadaun pressiza ran.
“relasina ho komemorasaun Dom Bosco nian, atividade ne’ebé ami halo mak hanesan Dom Bosco hadomi ambiente hodi halo limpeza iha tasi ibun, depois ida ne’e ami halo reflesaun liuliu oinsá mak família saleziana, hodi halo atividade doasaun raan ho asaun voluntariamente hodi ajuda ema seluk liu husi raan turuk ida,” dehan nia.
Aleinde ida ne’e, Sira mos identifika ema kbiit-la’ek sira, hodi fornese buat ruma ba sira, atu nune’e sira bele sente katak Dom Bosco hadomi ema hotu, la hare’e ba ema ida rua de’it.
