Komando PNTL Selebra Loron Nasional Feto “Empodera Feto iha Instituisaun PNTL” Featured

By Ekipa INDEPENDENTE Novembru 07, 2023 3161
Komando PNTL Selebra Loron Nasional Feto ho tema “Empodera Feto iha Instituisaun PNTL”, iha Salaun Auditoriun CFP, Komoro, Dili, (07/11). Foto:Media PNTL. Komando PNTL Selebra Loron Nasional Feto ho tema “Empodera Feto iha Instituisaun PNTL”, iha Salaun Auditoriun CFP, Komoro, Dili, (07/11). Foto:Media PNTL.

DILI: Komando Polísia Nasional Timor-Leste tersa ne’e (07/11), komemora loron nasional feto ho tema “Empodera Feto iha Instituisaun PNTL”, hodi hakbiit liu tan kapasidade feto sira ne’ebé haknar aan iha instituisaun estadu nian.

Tuir Komandante Jerál PNTL Komisariu Jerál Polísia Henrique da Costa hatete,  loron ida ne’e hanesan onra no prestijiu ida ba PNTL liu-liu mai iha feto PNTL sira, ho prezensa Sekretariu Estadu Igualdade nian sai hanesan motivasaun ida ba komando PNTL,  liu-liu ba feto sira atu bele hala’o servisu ho diak liu tan.

“Aproveita loron ida ne’e, lori PNTL hakarak kongratula ba inan feton sira Timor laran tomak liu-liu ba feto sira ne’ebe ohin marka prezensa iha fatin ida ne’e hanesan reprezentante Parlamentu Nasional no ita hotu ne’ebe marka prezensa iha ne’e, ita hotu hatene katak Governu deside katak loron 03 fulan Novembru hanesan loron espesial ba inan feton sira iha Timor-Leste no sai hanesan loron nasional ba feto”,dehan nia liu husi diskursu iha Salaun Auditoriun Centru Formasaun Polísia Akademia, Komoro, Dili.

Komisariu Jerál Polísia ne’e hatutan, loron 03 fulan Novembru hanesan loron ne’ebé hodi fó onra ba feto Timor oan hotu, liliu heroína Maria Tapo,ne’ebé ho ninia dedikasaun tomak no brani bele servi hamutuk ho asuwa’in mane sira iha luta okupasaun durante tinan 24 ne’ebe ikus mai Timor-Leste sai duni livre no independensia.

Nune’e, iha biban ne’e, Komandante Jéral parabeniza feto Timor-Leste, no husu ba feto PNTL atu dedika an ba iha Instituisaun no tenta buka hatene siensia foun sira ne’ebé relasiona ho servisu PNTL nian.

Iha fatin hanesan Membru Parlamentu Nasional Maria Rosa da Câmara ‘Bisoi’ feto ne’ebé reprezenta Presidente Parlamentu Nasional, iha inia diskursu hatete, feto sira ne’ebé tama iha instituisaun PNTL hodi dedika an no kontinua la’o tuir pasu ne’ebé Rezistensia Armada no Frente Klandestina inklui Diplomata sira halo hodi hari’I nasaun independensia ida ne’e. no feto iha direitu atu hetan eskalaun hanesan ho mane.

“Hau enkoraja tebes ita bo’ot sira maske hasoru problema barak hanesan tuda malu, baku malu, oho malu iha ne’ebe deit, maíbe feto mós tama no envolve iha ne’eba maske iha risku loron manas, udan, kalan, feto mós iha tránzitu hodi komanda, feto mós iha parte investigasaun hodi hasoru krime sira, iha fronteira mós feto iha, buat sira ne’e hotu hau enkoraja feto iha PNTL nia laran hakat duni pasu ida ne’ebe maka’as liu hala’o nia kna’ar iha instituisaun importante ida iha Timor-Leste”, haktuir Membru Parlamentu Nasional ne’e.

Entretantu, Sekretária Estadu Igualdade (SEI) Elvina Sousa Carvalho, rekonese katak feto PNTL nia servisu hatudu duni nia kualdade.

Sekretária dehan, loron 03 fulan-Novembru nuudar loron ne’ebé estadu desidi hodi fó onra ba heroina, martires no feto maluk sira nia luta ba ukun rasik an.

Tuir Governante ne’e, luta ukun rasik ann ida ne’e hotu ona, kontribuisaun ne’ebé sira halo ho sira nia koragem hotu ona, agora oinsa atu bele kontinua no prepara ba futuru ne’ebé diak, liu-liu atu bele fó onra ba iha kontribuisaun, hodi ita hotu ohin loron bele hetan nasaun ida ne’ebé livre no independente.

“Tempu to’o ona atu ita hotu fó onra ba ita nia heroína sira liu husi ita nia kontribuisaun matenek hodi bele desenvolve rai ida ne’e ba oin. Konta ho ami Sekretaria Estadu Igualdade ba imi feto PNTL sira, ita lao hamutuk hodi bele asegura desenvolvimentu femenina PNTL nia iha rai ida ne’e,”dehan SEII.

Enkuantu, partisipa iha serimonia ne’e, Komandu PNTL hamutuk ho Komandante Komandu Supervizaun, Komandante Munisipiu, Unidade no Femenina PNTL sira husi munisipiu, unidade, gabinete no departamentu sira PNTL nian. Marka mós prezensa Komandante TLPDP, reprezentante UN Women, Prezidente AESPNTL, TAF, UNDP, Femenina F-FDTL inklui konvidadu sira seluk.

Rate this item
(0 votes)

Independente Digital TV