MSSI sei Hasa’e Osan Idozus to’o $100 Featured

By Mariano Mendonça Novembru 08, 2023 764
Ministra Solidariedade Sosial no Inkluzaun, Veronica das Dores. Foto:Dok/INDEPENDENTE. Ministra Solidariedade Sosial no Inkluzaun, Veronica das Dores. Foto:Dok/INDEPENDENTE.

DILI: Tuir planu, Ministériu Solidariedade Sosial no Inkluzaun sei hasa’e osan ba idozu sira husi $57 to’o $100.

Ministra Veronica das Dores hatete, Ministériu nia planu prioridade ba tinan 2024, primeiru prográma mak erois moris, sura kedas husi idade tinan 60 to'o tinan 123.

Nia dehan, sira ne’e tenke sai duni prioridade tanba sira terus durante tinan 24 to'o agora no balun forsa atu laiha.

Tan ne’e, Ministra ne’e afirma, sidadaun hirak ne’e mak merese goza sira-nia direitu ne'e.

"Sura kedas husi 60 anos to'o 123 anos, ida ne'e mak ohin ami hala'o hela programa prioridade ne'ebé tanba ita ko'alia katak sira terus iha 24 anos, mai tan 21 anos entaun 45 anos ne'e sira hein atu atu mate, signifika idozu no liu-liu difisiensia sira."

"Idozu la'os invalides mais idozu no invalides mak espesifiku duni ita tenke atende nafatin, sira nia osan sa'e, ita bele sa'e katak $57 até $100 dollar tuir tinan," informa Ministra Veronica hafoin halo aprezentasaun orsamentu MSSI nian ba komité revizaun orsamentu (KRO) iha Ministériu Finansas, Tersa (07/11).

Orsamentu ba idozus no invalidus ne’e, nia dehan, MSSI aprezenta hamutuk ho programa sira seluk ho total millaun $30.

"Tinan 2024 ne'e, ami iha orsamentu $30 miloens no adisional laiha, ida ne'e mak tetu orsamentu fó mai ami,” dehan nia.

Nia hatutan, nia parte aprezenta duni adisional maibé tanba iha programa balun hasai tiha, nune’e adisional mós hasai.

"Ami hanoin katak di'ak liu hasai, ami hadia lai tetu depois mak haree, hein to'o Konsellu Ministru, maibé ami-nia adisional $17 miloens ne'e ami esklui tiha," nia dehan.

Entretantu, rekorda katak, Parlamentu Nasionál iha diskusaun ba Orsamentu Jeral Estadu 2022 deside hodi hasa’e osan idozus ba $50 kada fulan.

Ho desizaun ida ne’e, iha mudansa ba osan idozus ne’ebé molok ne’e $20 kada fulan ba $50.

Rate this item
(0 votes)

Independente Digital TV