Komandante Jeral daruak Polisia Nasionál Timor-Leste, Komisariu Polisia Pedro Belo deklara, Komando prontu PNTL prontu kumpre desizaun governu nian kona-ba reativa polisia reformadu 158.
"Ami aseita ona desizaun, ne'ebé Konsellu Ministru aprova ona rezolusaun atu reativa polisia reformadu na’in 158, tanba ne'e saida mak hakerek ona iha rezolusaun ne'e hatun mai par ami atu ezekuta, laos atu kontra fali, ne'e laiha," dehan Pedro ba jornalista sira iha Sentru Formasaun Polísia Akademia Komoro, Dili, Kinta (28/09).
Pedro dehan, durante ne’e Komando PNTL hein hela desizaun legal husi governu hodi bele implementa.
“Kuandu públika ona iha Jornál da Repúblika pontu desizaun hira mak hakerek iha desizaun laran ne'e ita ezekuta mak ida ne'e, laiha ida atu kontra, bainhira desizaun ne'e la viola lei, ita implementa," katak nia.
Iha fatin hanesan, Ministru Interior (MI), Francisco da Costa Guterres hatete, governu foti desizaun atu reativa polisia reformadu hirak ne’e atu bele kria kondisaun ba sira molok sira fila ba vida sivil.
Bainhira polisia fila ba hamutuk ho komunidade, nia dehan, presiza nafatin iha ligasaun ho Instituisaun PNTL atu kontinua halo servisu ruma hodi kontribui hametin estabilidade ba komunidade nia leet.
"Atu implementa desizaun hein publikasaun iha Jornál da Repúblika, ha'u sei hamutuk ho Komandu PNTL atu kria kondisaun ba sira reformadu na’in 158," dehan nia.
Molok ne’e, Konsellu Ministru liu husi ninia reuniaun deside hodi reativa polisia reformadu na’in 158 ne'ebé Komando Polisia Nasionál Timor-Leste reforma.
Konsellu Ministru aprova projetu Rezolusaun Governu ne’ebé aprezenta husi Ministru Interiór, Francisco da Costa Guterres, ba reativasaun pesoál ho funsaun polisiál sira husi Polísia Nasionál Timor-Leste (PNTL).
"Ho hanoin katak dignifikasaun sentidu servisu husi polísia PNTL nian mak importante tebtebes ba funsionamentu efikás no ba manutensaun konfiansa husi públiku iha instituisaun ne'e, ba fortalesimentu morál no komprometimentu husi polísia, ne’ebé pozitivamente influensia kualidade servisu ne’ebé sira fó ba komunidade," informa komunikadu ne'ebé Jornalista Jornal INDEPENDENTE asesu husi gabinete media Prezidensiá Konsellu Ministru, Kuarta (27/09).
Diploma ida ne’e hakarak atu rezolve kestaun pasajen ba situasaun apozentasaun polisia na’in 158 nian, ne’ebé halo ona durante governasaun anteriór liu husi prosedimentu ida ne’ebé hetan ona marka ho irregularidade oioin.
Nune’e, Komunikadu ne’e dehan, Governu reativa polísia hirak ne’e no fó fali kompensasaun ba sira-nia tempu ne’ebé durante sira hala’o iha tempu apozentasaun, ne’ebé tuir ho sira-nia montante remunerasaun baze mensál no suplementu remuneratóriu sira ne’ebé sira tenke hetan bainhira sira seidauk tama ba situasaun reforma, ho deskontu ba montante ne’ebé benefisiárius kompensasaun simu hanesan pensaun ferik-katuas nian.
