Na’in husi Empreza East Timor Trading Group of Companies, Sakib Awan, hato’o kestauan ne’e hafoin hasoru-malu ho Primeiru Ministru, Kay Rala Xanana Gusmão.

Sakib Awan hatete, durante ezistensia Timor Trading Group iha Timor-Leste, fó ona empregu ba Timor-oan 200 resin.

Timor Trading Group nu’udar empreza ne’ebé hamahan empreza sira seluk hanesan Gloria Jean's, Burger King, Circe, Discoveri Hotel no seluk tan.

Iha tinan 10 ikus ne’e, Sakib dehan, ninia empreza kontribui millaun $55 ba reseitas estadu nian, liu husi taxa.

"Iha mehi ida husi East Timor Trading atu harii serbisu ba porsentu 1 populasaun (TL) nian, ne'e signifika 13 mill fatin serbisu iha Timor-Leste.”

“Ha'u dehan katak bainhira ha'u fila ba Maromak, Na’i Maromak sei husu saida mak ita-boot halo iha Timor-Leste, (ha’u) dehan katak ‘ha'u Kontribui ba Timor nia Dezenvolvimentu, kria oportunidade ba Timor-oan sira’. Tanba ne'e mak objetivu bele harii serbisu rihun 13 sai hanesan objetivu ida ba empreza ida ne'e," dehan nia hafoin hasoru PM Xanana iha Palásiu Governu, Kinta (28/09).

East Timor Trading, nia afirma, kontribui ba planu dezenvolvimentu no kontribui mós ba planu governu nian.

Area ne'ebé East Timor Trading sei investe atu bele kria empregu ka serbisu mak area sira hanesan manufakture, prosesamentu no negosiu iha agrikultura.

"Timor-Leste iha oportunidade barak, ami hanoin katak importante mós atu bele sasan sira ne'ebé importa husi li'ur bele halo mós iha ha Timor-Leste par ita la presiza depende de'it ba sasan ne'ebé ita importa,” dehan nia.

East Timor Trading, nia hatutan, sei halo investimentu iha area Fomentu II. Investimentu ne’e sei halo tuir faze. Faze dahuluk sei investe milaun $12, faze daruak sei investe millaun $32, no faze datoluk sei investe millaun $50.

"Husi projetu ne'ebé ami sei halo iha Fomentu II mak business investiment Jean's, ida ne'e sei lori tinan lima ba to'o tinan hitu, husi ne’ebá sei kria empregu. Ha'u hanoin katak husi investimentu ne'e sei kria empregu maizumenus rihun 1.”

“Sei iha tan atividade sira seluk ne'ebé sei mai husi projetu ida ne'e, ne'ebé sei fó mós serbisu ba Timor-oan sira. Objetivu mak ami bele kontribui mós reseitas estadu nian, ami iha komitmentu tomak atu kontinua investe iha Timor-Leste."

Na’in ba empreza ne’e hatutan, nia parte mós planeia atu neneik-neneik muda jestaun empreza nian ba Timor-oan.

“Uluk iha ema 35 ne'ebé sai hanesan Manager ba kompaña, ohin loron tuun ba 17, no neneik-neneik planu kompaña nian mak atu pasa ba Timor-oan rasik. Hakarak dehan katak eziste ona iha Timor tinan 20 resin, entaun iha mehi ida katak loron ida empreza ne'e bele jere ho kompletamente husi Timor-oan.”

"Ami hanoin katak planu ne'ebé daudaun ami sei iha ba dalan ida ne'e, karik tinan foun ami bele halo anunsia ida ne'ebé sei lori notísia di'ak kona-ba ida ne'e," Sakib hatete.

Entretantu, Primeiru Ministru Kay Rala Xanana Gusmão, espresa espresa apoiu tomak ba atividade ne'ebé empreza East Timor Trading hala'o iha Timor-Leste.