“Projetu perfurasaun bee moos iha Suku Vila-Verde, agora dadaun prosesu la’o hela, kuaza atinji ona 80%, hein deit atu kanaliza ba komunidade sira,”dehan Vise-Prezidente Komisaun Ezekutivu BTL,EP ba asuntu Bee Moos, Saneamentu no Drenajen, Gustavo da Cruz, iha Aldeia Baku Fini, Bairu Pite, sesta (29/09).
Nia hatutan, perfurasaun bee ne'ebé lokaliza iha Suku Vila-Verde ne'e, sei kanaliza ba Aldeia Tuana-Laran inklui Aldeia sira seluk ne’ebé seidauk asesu ba bee moos.
“Kanalizasaun refere kobre iha Suku Vila-Verdi liliu iha aldeia Tuana-Laran ate too iha foho leten eskola 4 Setebro UNAMET nian, kanalizasaun halo hotu ona hein sistema operariu sira bele asesu ona bee moos,”tenik nia.
Vise Ezekutivu akresenta, prefurasaun bee refere sei halo kanalizasaun ba komumidade uma kain atus lima resin, tanba perfurasaun bee nia kanalizasaun iha kada 20ltr/segundus.
Enkuantu, iha sorin seluk, Xefe Suku Vila-Verdi Abdul Mancoli Aranhado hatete, iha suku refere iha aldeia lima mak seidauk asesu bee moos.
Xefe Suku afirma, bainhira tempu udan mak komunidade sira husi aldeia lima (5) ne’e bele asesu bee, maibé bainhira tempu bailoron labele asesu bee moos tanba sira hela iha rai loron.
“Iha tempu udan hanesan ne’e bee iha, maibé tempu bailoron aldeia lima mak terus ba bee moos,” dehan Xefe Suku.
Entretantu, aldeia lima ne’ebé seidauk asesu ba bee moos mak hanesan, Aldeia Terus Nain, Mate Moris, 01 Setembru, Matua no Tuana-Laran.
