“Konsellu Ministru delibera hodi propor bá Prezidente Repúblika bá atribuisaun ordém Timor-Leste, Grau Medalla, bá señor Peter Roberts, Eis-Embaixadór ba komunidade Australia iha Timor-Leste,” dehan Ministru Finansas, Rui Augostu Gomes, liu husi komunikadu imprensa, iha Palasiu Governu, sesta ne’e (02/12).

Governante ne’e hatutan, asaun diplomátika ne’ebé dezenvolve husi Embaixador Peter Robert, iha kontributu ida ne’ebé signifikativu tebes, hodi benefisia ba pais no timoroan sira.

Nia dehan, papel fundamental ne’ebé Eis-Embaixadór ne’e halo liliu dezempeña iha konsolidasaun no hametin relasaun amizade no kooperasaun ne’ebé estabelese husi Estadu Timoroan no Estadu Australianu, ninia intervensaun ba konkretizasaun ba apoiu sira ne’ebé fó husi Estadu Australianu ba Estadu Timoroan hodi kombate ba pandémia moras Covid-19.

Aleinde, hatán no fó asisténsia ba vítima inundasaun sira ne’ebé Timor-Leste hasoru iha loron 4 fulan-abril tinan 2021.

Enkuantu, ninia asaun empeñu no permite ona atu garante apoiu Estadu Australianu hodi ezekuta medida balun ne’e, prevee ona iha Planu Rekuperasaun Ekonómiku no reforsu hodi apoiu Estadu Australianu iha ámbitu ba kapasitasaun no formasaun rekursus umanus timoroan nian, liuliu liuhusi Australian Pacífic Training Coalition.