Konsellu Ministru delibera ona atu aprova, tuir projetu ne’ebé aprezenta husi Ministru Defeza Interinu, Fidelis Manuel Leite Magalhaes, ba realizasaun ba prosedimentu esesionál ba rekrutamentu militár nian no hahú husi Maiu 2023.
Nia haktuir, ho númeru ida ne’e fahe hanesan tuir mai ne’e: a) Militár na’in 29 ba Kuartél Jenerál; b) militár na’in 10 ba Komponente Terrestre; c) Militár na’in 12 ba Komponente Navál; d) Militár na’in 6 ba Komponente Aérea Lijeira; e) militár na’in 5 ba Sentru Instrusaun Komandante Nicolau Lobato; f) Militár na’in 18 ba Unidade Apoiu Servisu; g) militár na’in 4 ba Unidade Polísia Militár; militár na’in 3 ba Unidade FALINTIL.
"Determina ona katak efetivu atu inkorpora iha prosedimentu ida ne’e inkorporasaun sei rekruta hamutuk ema na’in 87. Konsellu Ministru rona no hetan aprovasaun pedidu ida husi Ministeriu da Defeza, ohin ha'u rasika hanesan Ministru Defeza einezerxisiu maka aprezenta ba konsellu Ministru proposta ida atu halo inkorporasaun, atu inkorporasaun foinsa'e na'in 87," dehan nia hafoin reuniaun Konsellu Ministru iha Palásiu Governu, Kuarta (26/04).
Nia afirma, Ida ne'e ba sira ne'ebé mak Lisensiadu, Mestradu iha area importante sira ne'ebé mak Ministeriu Defeza liu-liu F-FDTL presiza, hanesan Saúde, sira serbisu iha Komponente terrestre, komponente Naval no presta serbisu ba iha Komponente area lizeira, Sentru instituisaun komandante Nicolao Lobato
Sira ne'e iha unidade apoiu serbisu no mós ba unidade Polísia Militár sira ne'e importante tebetebes tanba sira ne'e iha kualifikasaun iha Lisensiadu, Mestradu iha area espesifiku hirak ne'e, balu entre sira ne'e Injineiru IT, injineiru Sivil no mós Jurista sira, tanba sira ne'e iha Lisensiadu no Mestradu no iha grau akademiku espesifiku ba área ne'ebé F-FDTL presiza.
Ida ne'e dalan ida mós para atu kontinua kontribui ba profesionaliza F-FDTL, tanba ba mundu modernu agora ne'e forsa defeza ida mós presiza duni liu-liu maluk sira ne'ebé iha ona grau akademiku sira no espesialisade ka area espesializasaun sira ne'ebé bele kontribui ba atu F-FDTL sai hanesan forsa defeza ida ne'ebé mak konvensional iha modernu.
Ho ida ne'e mak Governu loke dalan halo inkorporasaun de'it ba sira iha F-FDTL ne'e mós hanesan dalan espesial ida para sira bele tama iha F-FDTL hahú serbisu iha F-FDTL. Sira na'in 87 ne'e sei halo ba agora iha fulan Maiu 2023.
