Konsellu Ministrus hala’o sorumutuk no aprova projetu dekretu lei ne’e aprezenta husi Ministru Ensinu Superiór Siénsia no Kultura (MESSK), Longuinhos dos Santos, kona-ba UNESCO nian ba edukasaun, siénsia no kultura UNESCO TL nian.

"Konsellu Ministru aprova projetu Dekretu Lei ida ne'ebé aprezenta husi Ministru Ensinu Superior Siénsia kona-ba Komisaun Nasionál Orgazasaun Nasoens unidas nian ba edukasaun siénsia no Kultura UNESCO Timor-Leste. Ho aprovasaun ba projetu Dekretu Lei ida ne'e loke dalan atu Timor-Leste iha duni instituisaun ne'ebé UNESCO nian ne'ebé mak serbisu ho Governu iha area sira hanesan edukasaun siénsia no kultura," dehan Ministru Fidelis Magalhaes, iha Palásiu Governu, horisehik.

Nia dehan, instituisaun ne'ebé harii sei iha tutela ba ministeriu mak membru Governu tau-matan ba iha área kultura nian, ida ne'e mós hanesan rekezitu ida ne'ebé mak UNESCO fó ba pais membru sira.

Objetivu husi diploma ida-ne’e atu substitui Komisaun Nasionál UNESCO anteriór Timor-Leste nian ba servisu públiku sentrál Administrasaun Direta Estadu nian ida ne’ebé foun, dependente ba membru governu foun ne’ebé responsavel ba área kultura nian.

Dekretu-Lei ida-ne’e ho objetivu atu define estrutura orgánika interna foun ida no posibilita envolvimentu boot husi Governu ba funsionamentu  no atividade husi komisaun ida ne’e.

Komisaun Nasionál UNESCO Timor-Leste nian ninia misaun maka atu fó apoiu no dezenvolvimentu programa no realizasaun UNESCO nian iha territóriu nasionál, hodi buka atu envolve sidadaun no organizasaun nasionál sira iha melloria husi kompriensaun ba malu entre povu sira no iha promosaun ba justisa, dame no seguransa internasionál.