Enkuantu, benifisiariu na’in 37 ne’e mai husi suku sia (9) mak hanesan, Suku Aituto, Edi, Fatubessi, Maubisse, Liurai, Manetó, Harai-kiik, Manelobas no Maulau.

Diretór Jeral Dezenvolvimentu Rural (DJDR), Rosito Guterres hatete, iha Oitavu Governu nia mandatu ne'ebé lidare husi Primeiru Ministru Taur Matan Ruak tau prioridade liu mak ema.

Tanba ne'e Oitavu Governu hahú kedas iha 2021 konsege halo uma ba povu hamutuk 1.252 iha Teritorio laran tomak ne'ebé kada suku hetan uma tolu no uma ne'e 100% inaguradu.

Tanba, iha Timor-Leste komunidade barak mak uma ladi'ak ona, entaun iha 2022 Governu hasa'e tan kuantidade benifisiariu kada suku hetan uma sia (9) to'o sanolu-resin-rua (12), ne'ebé balun halo ona inagurasaun no balun mak seidauk.

Aleinde, iha tinan 2023, Governu halo mós UNP ba komunidade sira, ne’ebé iha kada suku sei hetan uma 12-18.

“Iha 2022, kada suku uma sia to'o sanolu, oras dadauk iha ona faze de finalizasaun no balun inagura ona ne'ebé total hamutuk 4000, teknikamente aprezenta ona, tanba ne'e programa ne'ebé di'ak ita kontinua eleva ida ne'e,”dehan nia iha Maubisse, sesta (28/04).

Nia esplika, programa Uma Naroman ba Povu (UNP) fahe ba tipo rua mak UNP regular ka plus A mak hanesan, uma tomak ba povu no UNP+ fahe kalen ba povu hodi troka kalen sira ne'ebé kuak no fruzu ona.

Iha fatin hanesan, Administrador Postu Adiministrativu Maubisse Claudino Mendonça hatete, iha PA Maubisi, UNP regular halo iha 2021 hamutuk 27 ne'ebé kada suku ida hetan uma tolu, tan ne’e, iha suku lima mak inagura ona no suku haat seidauk.

 Enkuantu, iha 2022 UNP hamutuk 91 ne'ebé dadaun ne'e iha hela prosesu laran no iha 2023 nian, total UNP regular hamutuk 105.

Aliened, UNP + hamutuk 333 ne'ebé ofisialmente lansa ona iha suku Maubissi.

"Tanba ne'e, ha'u husu ba benifisiariu sira ne'ebé simu ona kalen tenki fila troka kedas imi nia kalen, labele rai ba fa'an hodi halo fali ba lia mate no lia moris, se ida ne'e mak akontese mak sei taka dalan ba imi nia maluk sira seluk," katak nia.

Entertantu, Xefi suku Maubise Wilso Nelson Maria husu ba komunidade sira ne'ebé simu ona kalen tenki troka kedas tanba Xefi Suku no ekipa tékniku sira sei halo monotorizasaun.

Ba benifisiariu sira ne'ebé simu ona kalen mak fila ba troka kalen mak ekipa sei dada fila fali hodi entrega fila fali ba ema seluk.

Nune'e mós, iha loron ne'ebé hanesan DJDR, Rosito Guterres kontinua halo lansamentu ba UNP+ no  distribui zinku ba benifisiariu 37 iha Suku Kotolau, Postu Administrativu Laulara Munisipiu Aileu.