Ministru Presidensia Konsellu Ministru, Fidelis Leite Magalhães hateten, Projetu Dekretu-Lei ida ne’e delibera ona iha Sorumutuk Konsellu Ministrus iha loron 25 fulan-janeiru tinan 2023, maibé, aprezenta ba Presidente Republika haree iha rekomendasaun balun, tanba husu Konsellu Ministru atu halo ajustamentu.
Nia afirma, iha periodu tranjitoriu, bainhira projetu dekretu lei ne’e publika ona iha jornal da republika eziste ona presiza pazeadamente tenki halo ezekusaun no implementasaun hodi garante kualidade susu-been inan nian bele sai, maibe tenki tuir padraun ida la diak presiza hapara.
“Ida ne’e mak sira husu atu halo hotu ida ne’e iha period tranjitoriu ne’e para it abele iha kondisaun atu implementa dekretu lei konaba ba rejime jurídiku komersializasaun ba substituisaun susu-been inan nian,” Dehan Fidelis ba jornalista sira hafoin remata enkotru Konsellu Ministru iha Palasiu Governu (22/03).
Tanba ne’e, iha enkontru Konsellu Ministru(MK), Ministra Saude aprezenta introdusaun husi alterasaun balun iha faze redasaun finál nian, presiza submete fali projetu Dekretu-Lei ida-ne’e ba deliberasaun foun.
Antes ne’e iha loron 25 Fulan Janeiru 2023, Konsellu Ministrus aprova ona projetu Dekretu-Lei, ne’ebé aprezenta husi Ministra Saúde, Odete Maria Freitas Belo, kona-ba rejime jurídiku substitutu susu-ben inan nian.
Diploma ida-ne’e ho ninia objetivu atu regula komersializasaun, informasaun, publisidade no kontrolu ba kualidade produtu sira ne’ebé dirije direta ka indireta, ba alimentasaun laktente (bebé ne’ebé sei susu) no labarik sira to’o tinan tolu.
Nune’e, diploma ne’e halo regulasaun substánsia nutritiva no kritériu kompozisaun substituisaun susu-ben inan nian, estabelese regra ba ninia publisidade, define regra kona-ba informasaun, rotulajen no embalajen, no hatudu entidade kompetente ne’ebé mak autoriza ba komersializasaun.
Hanoin katak susu-ben inan nian, mak ai-han ideál ba labarik sira-nia kreximentu no dezenvolvimentu saudavel, bainhira inan sira la fó susu-ben ba labarik, ka fó susu-ben la kompletu, presiza atu asegura kualidade substitutu ba ida-ne’e, maibé mós ninia promosaun no distribuisaun la interfere protesaun ba ai-han inan nian, tuir rekomendasaun husi Kódigu Internasionál ‘Marketing’ Substitutu Susu-ben Inan nian no rezolusaun tuirmai husi Asembleia Saúde Mundiál nian.
Projetu Dekretu-Lei ne’e prevee kontra-ordenasaun hosi dolar amerikanu 1000 to’o 4000, posibilidade iha sansaun hanesan ajente ne’ebé la kumpre lei ne’e sei lakon ninia merkadoria no suspensaun komersializasaun ba produtu.
Prevee mós kriasaun Konsellu Nasionál Amamentasaun no Nutrisaun Infantíl nian ne’ebé sei iha misaun atu tulun Governu hodi define polítika nasionál promosaun no protesaun susu-ben inan no ai-han labarik nian. Ne’e mós sei atua hodi promove sensibilizaun populasaun kona-ba vantajen susu-ben inan nian no obrigasaun atu halo tuir regra sira kona-ba substituisaun no komplementár susu-ben inan nian.
