Ministru Prezidénsia Konsellu Ministrus, Fidelis Manuel Leite Magalhães hateten, projetu Dekretu Governu, ne’ebé  aprova  valor suplementu remuneratóriu ba formadór no númeru másimu oras ba funsionáriu ka ajente Administrasaun Públika ida-idak bele halo tinan-tinan no kondisaun ba ninia ezersísiu.

Nia informa, objetivu husi Dekretu Governu mak atu regula suplementu remuneratoriu ba formadór ne’ebé kria husi Dekretu-Lei nu. 73/2022, loron 19 fulan-outubru.

Tanba ne’e, Governu define katak valór oras remunerasaun ba formadór korresponde 100 porsentu husi remunerasaun oráriu ne’ebé kalkula tuir Rejime Suplementu Remuneratóriu Administrasaun Públika nian no katak númeru másimu oras anuál ne’ebé sei ezerse durante periodu normál serbisu formadór nian maka 120.

“See ita foti sira ba formasaun iha INAP ita tenki iha dektretu ne’e perimite para fo tan remunerasaun suplementu ba sira, bainhira ezerse kargu ne’e hanesan funsionariu formador ne’e nia valor ne’e ita tau 100 porsentu ho oras masimu mak 120, mak ohin konsellu Ministru tau ita haree kada oras ida osan 10 Dollar,” Dehan Fidelis ba jornalista sira hafoin remata enkotru Konsellu Ministru iha Palasiu Governu (22/03).

Tanba ne’e nia dehan, ida ne’e importante para  atu bele hanorin ho diak, prepara kuadru sira presiza ema neebe mak esperensia boot  ho matenek.

Nia informa, bainhira formador ida halo knaar hanesan funsionariu publiku, ida ne’e labele hanorin iha INAP, maibe ho dekretu lei ida ne’e bele loke dalan ba sira atu hanorin ona iha INAP hodi fo kapasitasaun ba funsionariu publiku sira.

“Ezemplu ita nia eis embaixador ida  nia hanesan funsionariu publiku, bainhira nia mai ita hakarak husu nia atu hanorin ne’e, maibe laiha dekreitu lei ida ne’e sei laiha autorizasaun atu hanorin funsionariu sira, tanba ne’e presiza iha eskluzividade, maibe agora ho dekretu lei ida ne’e  iha level remunerasaun ne’ebe mak ita fo mak masimu bele hanorin oras 120, kada oras ida sira  hetan osan 10 dollar atu hanoin,” hakotu nia.