Prezidente Prezidente Konsellu Imprensa, Virgílio da Silva Guterres, hateten political deadlock ne’e ekonomikamente implika mós ba funsionamentu kanál média sira nia publikasaun iha rai laran.
KI preokupa atividade kobertura média iha rai laran hahú nakdoko tanba mosu krize finanseiru iha instituisaun média privadu liu-liu média imprime no média eletrónika balun.
KI observa situasaun impase ne’ebé akontese iha 2017 to’o ohin loron, halo órgaun komunikasaun sosiál, ne’ebé sai kanál importante atu publika informasaun públiku idak-idak hahú taka tanba problema finanseiru.
“Krize ne’e mosu tanba rendimentu (média) depedenti ba publisidade ne’ebé boot husi governu,” informa Virgilio ba jornalista iha ninia knaar fatin Kintal Boot Dili, Sesta (03/08).
Konsekuénsia sira ne’ebé akontese iha rai laran rezulta média TIMOROMAN ho MATADALAN News taka provizóriu tanba faillansu iha manajementu, inklui Diáriu INDEPEDENTE ne’ebé dadaun ne’e mós hasoru krize finanseiru hodi hatún pájina publikasaun jornál husi 16 tun ba pájina 12 hodi hein too kondisaun di’ak fila fali foin bele reko pera fila fali.
Tanba ne’e, tuir planu Diáriu INDEPEDENTE sei fó saláriu ba funsionáriu no mós jornalista sira sei bayar cicil, inklui mós Diáriu Timor Post parte manajementu nian hapara kontratu rekursu umanu sira ne’ebé hela ema 27.
Ne’e duni, Prezidente Konsellu Imprensa hakarak fó xamada ba governu no mós opozisaun sira tenki tau konsiderasaun, tanba situasaun iha média nasionál hahú akontese nune’e, públiku hahú observa ona. Tanba neineik ba neineik hahú menus bainhira fó informasaun.
Alende ne’e KI mós husu ba média na'in sira tenki identifika problema hodi mobiliza rekursu hodi ultrá pasa krize finanseiru, kontinua desimina informasaun ba públiku sira hodi kompañia informasaun rai laran.
Tanba ne’e KI kontinua buka solusaun hodi diskute ho asionista média sira, inklui dirizente média nasionál sira hodi ultra pasa krize ne’ebé akontese iha rai laran, nune’e Média sira kontinua dezmina informasaun sobre situasaun iha rai laran.
KI mós halo esforsu sei buka kontaktu ho doadór sira ne’ebé iha hodi fó apoia materiál no moral ba média Timor-Leste.
