Xefe Departamentu Veíkulu, Nelson Martins hatete, iha semana rua liu ba simu ona karta ida husi Parlamentu Nasionál atu foti dadus kona-ba karreta Prado ne’ebé eis-deputadu sira muda xapa matríkula ba normál ne’e.

“Iha lista totál karreta ne’ebé ita nia eis-deputadu sira mai muda xapa normál hamutuk 53, tanba ne’e karreta 12 seluk mak seidauk muda”, dehan nia, iha edifísiu DNTT, Balidi-Dili, Sesta (3/8).

Husi totál karreta 53 ne’e sira iha ona dokumentu legál hanesan xapa matríkula, livrete ka (STNK) no folla inspesaun tau hotu ona sira nia naran tuir kódigu estrada nian.

Nelson hatete, too agora DNTT seidauk simu karta ruma husi Parlamentu Nasionál mai atu halo kanselamentu ba dokumentu karreta nian, tanba ne’e konsidera karreta ne’e nafatin eis-deputadu sira nian privadu rasik.

Nia hatutan, DNTT prontu hala’o atu halo kanselamentu ba dokumentu karreta Prado ne’e ba fali proprietáriu PN nian, maibé tuir prosesu normál jurídiku nian tenke hetan karta autorizasaun husi Parlamentu Nasionál no deklarasaun na'in ba karreta husi eis-deputadu sira ne’ebé konsidera sai ona na'in ba karreta ne’e.

Diáriu ne’e tenta husu atu foti naran eis-deputadu 53 ne’ebé muda ona karreta nia xapa ba privadu ne’e, maibé parte DNTT la disponivel atu publika tanba relasiona ho ema nia naran di'ak iha publika.