“Kazu foun na’in 9 ne’e iha mane na’in 2, feto na’in 7. Ema ho idade tinan 8-11 hamutuk na’in 2 no ema ho idade entre tinan 19-42 hamutuk 7. Nune’e ema sintomátiku na’in 1 no ema asintomátiku ka la hatudu sintomas na’in 8,”dehan nia liu husi telekonferensia iha CCD, (22/03).
Kazu foun na’in 4 iha Munisipiu Dili ho detalles hanesan tuir mai:
Kazu pozitivu 1, hela iha Aninfuik, Suku Kampo Alor, Posto Administrativu Dom Aleixo. Pozitivu ida ne’e detetatu iha teste atu hetan autorizasaun esepsionál sai husi serka sanitaria Dili, ba Covalima. Kazu ida ne’e, estudante UNPAZ, Fakuldade Direto, hahú iha sintomas iha loron 18 fulan marsu 2021.
Kazu pozitivu 2, hela iha Aldeia Bidau Tokobaru 2, Suku Kulu-hun, Postu Administrativu Cristo Rei. Pozitivu hirak ne’e kontaktu-besik ho kazu iha cluster hanesan, ne’ebé anunsía iha loron 20 fulan marsu.
Kazu pozitivu 1, hela iha Aldeia 20 de Setembro, Suku Bebonuk, Postu Administrativu Dom Aleixo. Pozitivu ida ne’e kontaktu-besik ho kazu iha cluster hanesan.
Ho nune’e, kazu detetadu ka pozitivu iha Munisipiu Dili husi loron 7 fulan marsu 2021, to’o ohin loron 22 fulan marsu hamutuk hotu 183.
Kazu detetadu 183 iha Dili ne’e, fahe ba cluster 35, namkari iha instituisaun 4, eventu 1, Suku 10, fatin kuarentena 1 no iha Postu Administrativu D. Aleixo, Vera Cruz, Nain Feto no mós Cristo Rei.
Husi cluster 34 ne’e, iha cluster 14 mak liu ona semana 1 la iha kazu foun.
Kazu foun na’in 4 husi Munisipiu Viquque no hamutuk hotu Munisipiu Viqueque deteta ona kazu konfirmadu nain 8.
Kazu foun hirak ne’e, hela iha Aldeia Mamaluk (Beloi), Suku
Karaubalu, Viqueque. Kazu konfirmadu hirak ne’e kontaktu-besik ho profisionál saúde ne’ebé halo kursu pós-laboral iha UNTL no fila husi Dili ba Viqueque iha loron 8 fulan marsu.
Entretantu iha Munisipiu Lautem, ohin deteta kazu foun 1. Kazu ida ne’e halo viajen husi Dili ba Lautem
iha loron 18 fulan marsu tinan 2021.
Kazu pozitivu ne’e estudante UNITAL, iha Lautem hela iha
Aldeia Reisoru, Suku Home, Lospalos Vila. Iha Dili hela iha Aldeia Bedois, Suku Camea.
Nune’e husi horiseik loron 21 mai ohin loron 22 fulan marsu hamutuk ekipa laboratoriu halo ona teste PCR ba ema na’in 656.
No husi loron 19 to’o ohin, loron 22fulan marsu tinan2021, teste PCR ba ema atu hetan autorizasaun esepsionál atu sai husi serka sanitária husi Munisipiu Dili hamutuk 420.
Dadus jeral foun ba loron ohin hamutuk na’in 9, rekuperadu na’in 4 no kazu ativu ne’ebé baixa hela iha izolamentu hamutuk na’in 211.
SIJK nafatin apela ba populasaun ne’ebé saí husi Dili ba munisipiu sira seluk, entre loron 5 to’o loron 9 fulan marsu madrugada, molok serka sanitaria hahú tama iha vigor iha Dili, atu favor ida aprezenta-an ba autoridade saúde sira ne’ebé besik-liu, iha imi nia hela fatin, hodi bele hetan atendimentu.
Apela mós ba komunidade iha munisipiu sira hotu, wainhira
hatene kona-ba ema ruma ne’ebé sai husi Dili molok serka sanitaria hahú iha Dili, halo favor informa hela autoridade sira atu bele halo atendimentu ba sira.
Apela mós ba populasaun iha Munsipiu Dili no mós munisipiu sira seluk: wainhira sente isin manas, kakorok moras, inus-ben, mear, favor hakat ba Sentru Saúde ne’ebé besik-liu atu bele hetan atendimentu.
Apela ba populasaun Timor-Leste tomak, liu-liu iha Munisipiu Dili, Baucau, Viqueque ho Lautém, atu nafatin hakmatek iha uma-laran. Favor lalika buka halibur malu. bainhira sai husi uma, labele haluha proteje-an nafatin ho meius hanesan:
(a) Uza mascara;
(b) fase liman beibeik ho sabaun ka dezinfetante ruma;
(c) evita kose liman ba matan, inus ho ibun;
(d) wainhira kumprimenta malu, lapresiza ka’er liman, bensa-liman, rei-malu ka haku’ak malu;
(e) evita halibur malu barak;
(f) hamri’ik ka tur do’ok husi ema seluk, mínimu metru ida ho balun.
Jornalista: Saturnina da Costa
Editor: Jose Sarito Amaral
