Material protesaun hirak ne’e simu direita husi Ministra Negosiu Estranjeiru, Adalgiza Magno, Embaixador Nova Zelandia ba Timor-Leste, Philips Hewitt no nia ekipa sira, reprejentante husi Ministériu Saúde, nomos Diretor Exekutivu Servisu Autonomu Medikamentu no ekipa saúde (SAMES).
Embaixador Nova Zelandia, Phips Hewitts iha nia diskursu badak hateten, apoiu ne’e liuhusi kooperasaun bilateral entre nasaun Timor Leste no Nova Zealandia durante ne’e.
Nia dehan, kooperasaun ne’e, Governu Nova Zelandia prontu apoiu iha kualker tempu bainhira Timor-Leste husu.
"Kooperasaun Bilateral entre Timor-Leste no Nova Zealandia metin kedan ona desde Timor-Leste Ukun an, antaun baihira tempu defisil ne’ebé Governu Timor Leste hakarak husu ajuda ba Governu Nova Zelandia, Governo Nova Zelandia prontu ajuda iha kualker tempo,"dehan Embaixador Nova Zelandia, iha Sala VIP Airo Portu Internasional Nicolau Lobato Dili.
Apoiu ekipamentu protesaun Covid-19 ne’e kompostu husi maskra, lisu fatin no aimoruk sira seluk, relasionadu Covid -19 iha Timor Leste.
Nia esplika, sidauk hatene kuantidade no tipu aimoruk hirak ne’e, maibe nia hateten katak aimoruk no material ba Covid -19 kuaze iha 500 kaisa.
Iha Fatin hanesan Ministra Negosio Estranjeiru no Kooperasaun, Adalgiza Magno hatoo agradese wain klean ba Governu no povu Nova Zelandia ne’ebe sempre prontu nafatin iha kualker tempu hodi ajuda Governu no populasaun Timor-Leste.
Iha oportunidade hanesan reprezentante husi Ministerio Saude, Santana Martins nuudar Diretór Exekutivu SAMES hatoo mos agradese wain ba ajudus ekipamentu Covid -19 nian no medikamentu hirak ne’e.
"Parte SAMES ohin simu ona medikamentu no material sira relasiona ho Covid-19 hanesan maskara, lixu fatin no buat seseluk tan,"dehan Santana.
Santana akresenta katak kuantidade ekipamentu Covid -19 nian seidauk hatene nia kuantidade tanba SAMES sei ba tau iha data base mak foin hatene aimoruk no material hirak ne’e.
Santana esplika, ekipamentu ne’e sei fahe ba Hospital sira hodi bele prevene Covid -19 iha Timor Leste.
Jornalista: Camilio de Sousa
Editor: Jose Sarito Amaral
