Kordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araújo informa, ohin loron 23 fulan-Marsu 2021, Sala Situasaun Sentro Integrado Jestun Krize deteta tan kazu foun 16, husi munisipiu Dili na’in 14 no Munisipiu Vikeke na’in 2.
“Kazu foun na’in 16 ne’e iha mane na’in 6, feto na’in 10, nune’e ema ne’ebé hetan sintomátiku na’in 4 no ema asintomátiku ka la hatudu sintomas na’in 12,”dehan nia liu husi telekonferensia iha CCD, (23/03).
Kazu foun na’in 14 iha Munisipiu Dili ho detalles hanesan tuir mai:
Kazu pozitivu 3, hela iha Aldeia Bidau Tokobaru 2, Suku Kuluhun Posto Administrativu Cristu Rei. Pozitivu hirak ne’e kontaktu besik ho kazu iha cluster hanesan ne’ebé anunsia horseik loron (22-03-2021).
Kazu pozitivu 9, hela iha Aldeia 20 de Setembro, Suku Bebonuk, Postu Administrativu Dom Aleixo. Pozitivu hirak ne’e kontaktu-besik ho kazu iha cluster hanesan.
Kazu positivu 1 hela iha Aldeia Kakeu-laran, Suku Becora, postu Administrativu Cristo Rei. Positivu ida ne’e detetadu iha MTCI, ekipa sira sei buka tuir ninia ligasaun ho cluster sira seluk.
Ho nune’e, kazu detetadu ka pozitivu iha Munisipiu Dili husi loron 7 fulan marsu 2021, to’o ohin loron 22 fulan marsu hamutuk hotu 197.
Kazu detetadu 197 iha Dili ne’e, fahe ba cluster 35, namkari iha instituisaun 4, eventu 1, Suku 10, fatin kuarentena 1 no iha Postu Administrativu D. Aleixo, Vera Cruz, Nain Feto no mós Cristo Rei.
Husi cluster 37 ne’e, iha cluster 14 mak liu ona semana 1 loron 5 la iha kazu foun.
Kazu foun na’in 2 husi Munisipiu Viquque no hamutuk hotu Munisipiu Viqueque deteta ona kazu konfirmadu nain 10.
Kazu foun hirak ne’e, hela iha Aldeia Umane-iku, Suku Ossu-de Cima, Postu Ossu. Kazu konfirmadu ne’e kontaktu besik ho kazu ne’ebé deteta iha fatin hanesan. Ho nune’e kazu detetadu iha Munisipiu Vikeke fahe ba Cluster 3.
Nune’e husi loron horiseik 22 mai ohin loron 22 fulan marsu hamutuk ekipa laboratoriu halo ona teste PCR ba ema na’in 689.
No husi loron 22 to’o ohin, loron 23 fulan marsu tinan 2021, teste PCR ba ema atu hetan autorizasaun esepsionál atu sai husi serka sanitária husi Munisipiu Dili hamutuk 171.
Dadus jeral foun ba loron ohin hamutuk na’in 16, rekuperadu laiha no kazu ativu ne’ebé baixa hela iha izolamentu hamutuk na’in 227.
SIJK nafatin apela ba populasaun ne’ebé saí husi Dili ba munisipiu sira seluk, entre loron 5 to’o loron 9 fulan marsu madrugada, molok serka sanitaria hahú tama iha vigor iha Dili, atu favor ida aprezenta-an ba autoridade saúde sira ne’ebé besik-liu, iha imi nia hela fatin, hodi bele hetan atendimentu.
Apela mós ba komunidade iha munisipiu sira hotu, bainhira hatene kona-ba ema ruma ne’ebé sai husi Dili molok serka sanitaria hahú iha Dili, halo favor informa hela autoridade sira atu bele halo atendimentu ba sira.
Apela mós ba populasaun iha Munsipiu Dili no mós munisipiu sira seluk: wainhira sente isin manas, kakorok moras, inus-ben, mear, favor hakat ba Sentru Saúde ne’ebé besik-liu atu bele hetan atendimentu.
Apela ba populasaun Timor-Leste tomak, liu-liu iha Munisipiu Dili, Baucau, Viqueque ho Lautém, atu nafatin hakmatek iha uma-laran. Favor lalika buka halibur malu. bainhira sai husi uma, labele haluha proteje-an nafatin ho meius hanesan:
(a) Uza mascara;
(b) fase liman beibeik ho sabaun ka dezinfetante ruma;
(c) evita kose liman ba matan, inus ho ibun;
(d) wainhira kumprimenta malu, lapresiza ka’er liman, bensa-liman, rei-malu ka haku’ak malu;
(e) evita halibur malu barak;
(f) hamri’ik ka tur do’ok husi ema seluk, mínimu metru ida ho balun.
Globalmente, pandemia covid-19 hamate ona ema na'in 2.716.035 no ema millaun 123 mak afeitadu.
Jornalista: Saturnina da Costa
Editor: Jose Sarito Amaral
