Tuir Diretór Ezekutivu ADTL Cesario da Silva hatete, apoiu umanitária ne’ebé ADTL halo ba ema ho defisiensia sira bainhira rona iha situasaun serka sanitária, ema ho defisiensia sira komesa preokupa kona-ba nesesidade bazika no nesesidade híjiene.
Nune’e ADTL halo kedas nia intervensaun liuhusi estabelese postu ida ho naran Apoiu Umanitáriu Ba Ema Ho Defisiensia, iha loron sabdu (20/3). Apoiu ne'e fahe ona hahu iha loron segunda horsehik (22/3).
Postu apoiu umanitária ne’e ho nia objetivu atu halibur nesesidade bazika sira no nesesidade híjiene atu kontinua distribui ba maluk defisiensia sira ne’ebé alistadu.
Ho nune’e ema ho defisiensia sira ne’ebé ADTL apoiu liuhusi postu apoiu umanitária ne’e, mai husi grupu organizasaun defisiensia sira.
“Ema ho difisiensia sira kuaze tipu defisiensia hotu ami responde defisiensia matan, defisiensia tilun, defisiensia fiziku, inklui defisiensia psikologi sosial, hirak ne’e hotu ami responde no intervensaun ida ne’e ami halo porvolta ema ho defisiensia atus 5,”dehan nia ba online Independente, iha knar fatin Maskarenhas, (23/03).
Nia esplika, nesesidade bazika ne’ebé fahe ba ema ho defisiensia sira mak hanesan, fós, mina, masin, supermie, no nesesidade hijiene hanesan, Sabaun, rinso, pepsodente, sanitaizer no mós maskara, inklui mós nesesidade bazika ne’ebé fó proteina.
“Iha mós proteina ami prepara foremugu no nesesidade hijiene ami prepara sabun, sanitaizer mós maske, atu fasilita maluk defisiensia sira hodi prevene an,”nia informa.
Apoiu sira ne’e, primeiru mai husi parseiru Partnership Human Development (PHD), ida ne’e governu Australia liu husi PHD, iha mós apoiu individu sira no inklui kompaña ne’ebé rezistu mak loja W4 iha Dili.
“Ami nia parseiru PHD, kuaze ami hetan aprovasaun orsamentu responde ba emerjensia iha fulan ida ne’e, ami iha rihun $5, ba ema ho defisiensia sira iha situasaun Covid-19, nune’e apoiu individu sira ne’e ami lakonta, inklui mós kompaña W4,”nia relata.
Entretantu, fós ne’ebé agora dadauk iha postu apoiu umanitária ema ho defisiensia hamutuk atus 2, nune’e ADTL mós hato’o ona pedidu ba Ministériu Soliedariedade Sosial no Inkluzaun (MSSI) atu distribui tan fós atus 450 hodi ajuda ba ema ho defisiensia sira.
Jornalista: Saturnina da Costa
Editor: Jose Sarito Amaral
