Tuir Program Officer ASIA Justice and Rights (AJAR), Inoçençio Xavier hatete, polisia halo servisu bazeia ba orintasaun Governu nian, laos polisia hasai ninia ordem ida fora husi rezulusaun governu, ne’e viola ona rezolusaun ne’e.
“Ami prekupa ho situasaun agora, tuir lolos polisia sira halo sira nia servisu mak ba hare ema sira iha bairu laran halibur maluk barak no iha fatin balun sira halibur malu joga bingo, ida ne’e mak ba atua, laos ba kaer fali ema ida ne’ebé ho movimentu hanesan fen, laen ho oan tula malu iha motor leten,”dehan nia iha edifisiu CNJTL, Farol, (22/03).
Tanba ne’e, sosiedade sivil husu ba Primeiru Ministru hanesan mós Ministru Interior, atu bele hare no husu komando halo relatoriu ida di’ak no muda estratejia ba operasaun.
Tanba polisia ladun efetivu no la interpreta espozisaun Governu nian no bainhira Governu liu husi Prezidensia Konsellu Ministru dehan iha rezolusaun ne’e laos nune’e, nusa polisia halo ida ne’e, kaer ema ba tau hamutuk iha sela detensaun laiha espasu.
Se kontinua ho Governu ho polisia nia politika ida ne’ebé lori ema tau hamutuk iha fatin ida ne’e mak sai fali Covid-19 ne’e.
Enkuantu ema hirak ne’e mak na’in 10 hanesan ne’e hetan positivu, ne’e sei da’et mós ba nia familia sira.
Entretantu molok ne’e iha serka sanitaria dahuluk, polisia kaptura ema na’in 233 ne’ebé halo ezersisiu ba halibuar hamutuk iha komandu munisipiu Dili.
