Tuir Prezidente CNJTL, Maria Dadi Soares Magno hatete, situasaun ida ne’ebé agora ema hotu infrenta no iha efeitu balun ne’ebé sosiedade enfrenta.
“Ha’u hakarak hatete katak, situasaun ida ne’ebé liga ba vida moris povu sira nian liu-liu ita nia juventudi sira ne’ebé agora dadauk sira rasik infrenta hela situasaun ida ne’ebé no ita presiza atu tulun ita nia joven sira ne’ebé hela iha kost,”dehan nia iha edifisiu CNJTL, Farol (22/03)
Nia hatutan, posko CNJTL ne’e inisiativa husi ekipa juventudi estudante apoiu umanitariu ne’ebé halo kordenasaun no buka meius atu bele ajuda joven sira.
Nia relata, dadus estudante ne’ebé tama mai iha CNJTL hamutuk atus 5 resin, nune’e kbiit ne’ebé ekipa posko CNJTL atu fahe uluk, ba iha estudante hamutuk 135.
Iha sorin seluk Xefe Ekipa Posko CNJTL, Rumão Piedade Mendonça hatete, ekipa posko CNJTL hanaran ekipa juventudi estudante apoiu umanitariu ba situasaun serka sanitaria ne’ebé agora dadauk Timor-Leste infrenta hela.
“Inisiativa ida ne’e husi ami joven sira no bazeia ba sasan ne’ebé ami iha ami hetan husi doador sira ne’ebé ho laran luak atu tulun ita nia maluk foinsa’e sira ne’ebé merese duni ih asitusaun ida ne’e,” nia dehan.
Ekipa posko CNJTL hetan apoiu sira ne’e husi maluk sira hanesan, Deputada Lidia Martins, Alisia Sarmentu, Patrosino dos Reis, AHMDTL, Maria do Ceu, Bepi no Depudata Arão Noe.
Apoiu ne’e ba maluk joven sira ne’ebé konsidera vulneravel liu iha situasaun serka sanitaria ne’e, tanba husi serka sanitaria limita ona movimentu husi kapital ba munisipiu.
Aliende sira nia apoiu fós saka 40, iha mós mina kaixa 3 no supermie kaixa 26.
