Tuir komunikadu imprensa neebé Online INDEPENDENTE asesu, husi númeru kazu nivel nasional 1035, maioria kazu nee akontese iha Kapital Dili ho kazu 698.

Aliende iha Dili, kazu dengue mosu mós iha munisipiu sira seluk hanesan, Ermera ho kazu 71,  Manatutu ho kazu  67, Baukau ho kazu 50, Manufahi ho kazu 49, Kovalima  ho kazu 31, Bobonaru ho kazu  24, Líkisa ho kazu 16, Aileu ho kazu  11 , Ainaro 12,  no Vikeke ho kazu 6.

" Hare husi kazu ne'e Dili kontinua aumenta ho numeru ne'ebé aas no munisipiu 11 mak dadauk nee rejista ona kazu dengue,”dehan komunikadu neebé Online INDEPENDETE asesu, kinta nee (27/01).

Husi numeru kazu mate ne'ebé  rejista, na’in 10 iha Dili, na’in 4 iha Ermera, na’in rua iha Kovalima, na’in ida iha Ainaro no na’in ida iha Bobonaro.

Entretantu, total kazu neebé rejista iha Kapital Dili ho numeru 698, husi Postu Administrativu Dom Aleixo ho total kazu 345, hafoin Postu Administrativu Cristu Rei ho kazu 140, Postu Administrativu Na’in Feto ho kazu 100 no Vera Crus ho total kazu 196.

Entretantu, husi numeru kazu ne'ebe aumenta, Ministra Saúde husu nafatin ba públiku atu aprezenta aan iha fasilidade saúde ne'ebe besik, bainhira sente isin manas ka laran sa’e, liman ain sikun moras atu bele hetan atendementu husi mediku sira.

Husu mós ba autoridade munisipiu no autoridade lokal sira atu bele orienta komunidade hala'o limpeza jeral iha ida-idak nia  aldeia no suku, fase tanke, bidon ka balde semana ida dala ida, limpeza roda at sira no vazu aifunan atu susuk labele tau tolun nomós uza roupa liman naruk bainhira toba iha tempu loron.

Asistente Editor: Saturnina da Costa