DILI: Ministru Prezidensial Konsellu Ministru, Fidelis Leite Magalhães hatete, ohin (28/01), Governu sei organiza funsionáriu administrasaun públika no sidadaun sira hodi limpeza iha fatin publiku no ida-idak nia uma, durante loron tomak iha Kapital Dili, hodi evita moras dengue.
"Governu fó sai katak, sei promove aban durante loron tomak, sei halo asaun limpeza iha nivel nasional ne'ebé sei organiza funsionáriu sira no orgaun servisu administrasaun publika nian, no apela ba sidadaun sira hotu no autoridade nivel nasional, hodi halo limpeza jeral iha fatin publiku no mós iha sidadaun ida-idak nia uma,’’dehan nia liu husi konferensia imprensa, iha Palasiu Governu, kinta nee (27/01).
Nia hatutan, kampaña ba limpeza nee hanesan parte ida husi asaun hodi prevene kazu dengue neebé kada loron rejista ho númeru aas.
Enkuantu, Ministeriu Administrasaun Estatal sei fó sai ba orgaun no administrasaun públika sira, kona-ba organiza no distribuisaun ekipa sira ba limpeza jeral ne'e.
Ho nunee, orientasaun fó sai ba asaun limpeza jeral ne'e sei halo iha loron aban 28 janeiru 2022 durante loron tomak iha nivel nasional.
"Agora ba semana sira tuir mai ne'e, hafoin reuniaun Konsellu Ministru sei foti fali dezisaun detaillu ba ita bo'ot sira, hanesan limpeza jeral ne'e atu halo semana-semana ka no atu semana ida dala hira, dezisaun hirak ne'e sei fó sai iha kuarta tuir mai,”tenik nia.
Entretantu, tuir dadus husi Ministeriu Saúde, liu husi Diresaun Nasional Saúde Públika Departamentu Vijilansia Epidemolojia relata, hahú iha loron 1 to’o 27 Janeiru tinan nee, kazu dengue sa’e ba 1035. Husi númeru nee, na’in 18 mak lakon vida.
Tuir komunikadu imprensa neebé Online INDEPENDENTE asesu, husi númeru kazu nivel nasional 1035, maioria kazu nee akontese iha Kapital Dili ho kazu 698.
Aleinde iha Dili, kazu dengue mosu mós iha munisipiu sira seluk hanesan, Ermera ho kazu 71, Manatutu ho kazu 67, Baukau ho kazu 50 , Manufahi ho kazu 49, Kovalima ho kazu 31, Bobonaru ho kazu 24, Líkisa ho kazu 16, Aileu ho kazu 11 , Ainaro 12, no Vikeke ho kazu 6.
Asistente Editor: Saturnina da Costa
