Tuir dadus husi Ministeriu Saúde, liu husi Diresaun Nasional Saúde Públika Departamentu Vijilansia Epidemolojia, hahú iha loron 1 to’o 26 Janeiru tinan nee, kazu dengue sa’e ona ba na’in 972. Husi númeru nee labarik na’in 18 mak mate.
Tuir komunikadu imprensa neebé Online INDEPENDENTE asesu, husi númeru kazu nivel nasional 972, maioria kazu nee akontese iha Kapital Dili ho kazu 648.
Aliende iha Dili, kazu dengue mosu mós iha munisipiu sira seluk hanesan, Ermera ho kazu 71, Manatutu ho kazu 67, Baukau ho kazu 47, Manufahi ho kazu 46, Kovalima ho kazu 31, Bobonaro kazu 23, Líkisa kazu 13, Aileu kazu 8, Ainaro kazu 8 no Vikeke kazu 6.
“Haree husi kazu nee, Dili kontinua aumenta no munisipiu 11 mak dadauk rejista ona kazu dengue” dehan komunikadu, neebé Online INDEPENDENTE asesu, kuarta horseik (26/01).
Husi númeru kazu mate neebé rejista, na’in 10 iha Dili, na’in 4 iha Ermera, na’in rua iha Kovalima, na’in ida iha Ainaro no na’in ida iha Bobonaro.
Entretantu, husi númeru kazu neebé aumenta, Ministeriu Saúde husu nafatin ba públiku atu atu aprezenta aan iha fasilidade saúde sira neebé besik bainhira senti isin manas ka laran sa’e, liman-ain sikun moras, atu bele hetan atendementu husi mediku sira.
Husu mós ba autoridade munisipiu no autoridade lokal sira atu bele orienta komunidade hala’o limpeza jeral iha idaidak nia aldeia no suku, fase tanke, bidon ka balde semana ida dala ida, limpeza roda aat sira no vazu aifunan atu susuk labele tau tolun no mós uza roupa liman naruk bainhira toba iha tempu loron.
Asistente Editor: Saturnina da Costa
