“Ha’u husu ba sarani sira atu kontinua reza ba amu Papa atu Nai Maromak bele haraik bensaun ba nia fatin di’ak iha Na'i Maromak nia kadunan santo,”dehan Kardeál liu husi konferensia imprensa ne’ebé hala’o iha Sala VIP, Airoportu Internasional Nikolau Lobato, Dili, tersa (22/04/25).
Kardeál mós observa katak, hafoin rona novidade tristeza katak, Santo Papa Francisco hakotu iis, sarani sira hatudu sira nia domin hodi ba sunu lilin iha estatua Na’in Feto iha Lecidere, no mós selebrasaun misa Amo Papa nian iha Tasi-Tolu, maske Governu seidauk iha programa ruma.
“Konfirma kona ba Amo Papa ninia mate, ita hare katak, sarani sira hotu, hatudu sira nia domin, sira nia saudades, ita hatene katak, ho vizita Amo Papa nian iha fulan-hirak liu ba ne’e, lori besik liu mai Timoroan barak, entaun ita haree katak oinsa reasaun espontañia sarani sira nian iha Altar Tasi-Tolu no Lecidere,”tenik Kardeál.
Enkuantu, tuir observasaun Online INDEPENDENTE nian iha terenu nota katak, hahú husi loron 21 to’o agora, sarani sira kontinua halo orasaun iha Lecidere no Tasi-Tolu hodi hasa’e orasaun ba Santo Papa.
