Vigáriu Episkopál Pastorál Arquedioseze Dili, Padre Juvito do Rego de Jesus Araujo hatete, dadaun ne’e igreja servisu hamutuk ho parte governu atu halo preparasaun ba serimonia funebre iha Tasi-Tolu Dili.

“Hakarak komunika ba publiku katak Misa Funébre ba Amu Papa Francisco ninian sei hala'o iha loron Sábadu 26 Abril lorokraik tuku neen iha Tasi-tolu,”dehan Vigario liu husi Konferénsia Imprensa ne'ebé hala'o iha Kâmara Eklesíastica, Lecidere, Kuarta ne’e (23/04).

Vigáriu Episkopál Pastorál Arquedioseze Dili mós husu deskulpa tanba antes ne'e komunika ona ba Públiku katak misa iha Domingo maibé bainhira simu komunikadu ofisiál husi vatikanu katak Amu Papa nia misa funébre sei hala'o iha loron 26 abril, iha tuku 10 dadersan, oras vatikanu.

Relembra fali katak, bainhira Amu Papa mai vizita Timor-Leste iha fulan hirak liu ba, governu ho igreja servisu hamutuk hodi simu Amo Papa nia prezensa.

“Maibé Amu Papa Maromak bolu hikas ona ba nia kadunan rohan laek, nune’e, governu ho igreja dala ida tan servisu hamutuk atu halo eventu ida ne'e la'o ho didiak, sai eventu ida ne'ebé manifesta nafatin povu, sarani no igreja iha Timor ninia domin ba Amu Papa Francisco," katak Vigáriu.

Iha fatin hanesan, Ministru Administrasaun Estatál Tomas Cabral hatete, serimonia ba misa Funébre ba Sua Santidade Papa Francisco sei lao tuir protukolu ne'ebé iha.

"Governu servisu hamutuk ho igreja, atu ita hala'o seremonia ida ne'e iha Tasi-Tolu, iha ne'ebá Polísia mak sei organiza oinsa sarani sira bele tama bá ne'ebá no  transporte sira sei la para arbiru deit sei la fó asesu ba populasaun atu tama," Ministru hato'o.

Enkuantu, misa Tasi-tolu sei Prezide husi Amu Bispo Dioseze Baucau Dom Leandro Maria Alves, no coro ne'ebé responsavel ba misa ne'e koru husi Dioseze Dili ne'ebé antes ne'e responsavel ona ba misa iha vizitasaun Sua Santidade Papa Francisco nia iha Tasi-Tolu, iha loron 10 fulan-Setembru tinan 2024.

Entretantu, tuir orariu misa requem iha Dioseze Maliana sei hala'o iha aban, loron 24 Fualn-Abril no Dioseze Baucau sei realiza iha Sábadu dader loron 26 fulan-Abril.