Primeiru Ministru Interinu, Vise Primeiru-Ministru, Ministru Koordenadór Asuntu Sosiais no Ministru Dezenvolvimetu Rural Abitasaun Komunitária Mariano Asanami Sabino hatete, Sua Santidade Papa Francisco nia vizita iha Timor-Leste fó mensajem furak ba timor oan sira no mensajen ne’e nunka haluha no sei hada’et ba jerasaun sira.
Nune’e, iha falesimentu Santo Papa nian ne’e, Governu dekreta lutu nasional durante loron hitu, atu konvida povu tomak iha teritoriu Timor-Leste atu bele hasa’e orasaun ba Santu Papa.
Nune’e mós, Governu ho igreja sei realiza misa funebre ba falesimentu Santo Papa nian iha tasi-tolu Dili, hodi hanoin hikas memoria Santo Papa nian.
“Mensajem ba ita tomak mak, ita nia fiar sai mak ita nia kultura, ne’e mak lema ne'ebé ita simu husi Amu Papa mai iha ne’e, tanba ne'e mak ohin ita dekreta ona lutu nasional durante loron hitu, ita hotu-hotu hasa’e orasaun, ba sira ne'ebé iha Dili laran mai halibur iha Lecidere, mai iha ne’e ita hader reza, durante Amu Papa seida’uk hakoi, depois iha loron hakoi, ita sei halo misa boot ida iha duni Tasi-Tolu, misa boot ne'ebé mak ita selebra iha Tasi-Tolu atu hanoin nia loron,”dehan Primeiru Ministru Interinu hafoin presta omenajen no asina livru kondolénsia ba falesimentu Santo Papa nian, iha Kâmara Eklesíastika Lecidere, Dili, tersa (22/04/25).
Nia dehan, durante loron lutu nasional ne’e, servisu públiku hotu sei la'o normal, maibé tenki la'o ho disiplina.
“Servisu públiku la'o hanesan babain, maibé la'o ho disiplina no haraik an no esforsu liu tan, tanba Amu Papa ida ne'e, nia servisu bá teritoriu tomak, servisu ba iha mundu tomak ho nia kondisaun fiziku hanesan ne’e mós nia mantein nafatin servisu, entaun ida ne'e inspira hotu-hotu, agrikultora, jovem, funsionáriu públiku, PNTL, F-FDTL, hotu-hotu hatudu ita nia disiplina dedikasaun hanesan saida mak Nia halo ba mundu," Asanami esplika.
Enkuantu, Santo Papa Francisco termina nia viajen moris iha mundo ne’e, iha loron 21 fulan-abril, tinan ne’e, iha tuku 07:35 oras vatikanu, no iha tuku 3:35 oras Timor-Leste, no papa Francisco husik hela mundo ne’e ho idade tinan 88.
