Kazu ne’ebé akontese durante tempu ne’e maka iha Suku Makadiki-Vikeke deskonfia asaltu malu entre militante partidu polítiku sira hodi rezulta ema na’in 18 hetan kanek.
Entretantu, akontesimentu seluk maka iha Laga-Baukau, Venilale-Baukau no Suku Maina-Lautem.
Kampaíña komísiu ikus liu iha Dili maka partidu FRETILIN no Partidu Demokrátiku (PD), nune’e partidu koligasaun Aliansa Mudansa ba Progresu (AMP) halo mini kampaña iha Atauru.
Iha kampaña ikus liu partidu hirak ne’e la’o ho di’ak maski mosu ‘barullu’ tuan iha Dili laran tanba militante sira halo karavana uza motorizada kanu racing.
Observasaun diáriu ne’e nian iha komisaun kampaña partidu FRETILIN, oráriu kampaíña komísiu hahú iha tuku 14:00 meiudia, maibé massa hahú ona mobiliza malu no halo karavana iha tuku 08:00 dadeer.
Movimentu ne’e konsege hamosu engarrafamentu totál ba atividade sira transportasaun iha Dili laran. Kuaze iha fatin-fatin massa FRETILIN domina tomak. Sidade Dili nakonu ho kór mean, ne'ebé hatudu imajen partidu FRETILIN nian.
Entretantu, iha fatin kampaña ikus iha Tasi Tolu laiha tan espasu, maibé massa husi partidu ne’e sei nadodon nafatin ho karreta no motór.
Iha Dili, Partidu Demokrátiku (PD) mós halo kampaña ne’ebé, maski nune’e massa partidu rua ne’e la’o hamutuk ho trankuilidade.
Durante kampaña FRETILIN no PD nian iha Dili laran hetan seguransa másimu husi Polisia Nasionál Timor-Leste (PNTL) no FALINTIL-Forsa Defeza Timor-Leste (F-FDTL), ne’ebé koloka iha área risku konflitu, nune’e situasaun la’o ho hakmatek to’o karavana husi militante sira ne’e remata iha kalan.
