Hanesan públiku hatene, molok pandemia Covid-19 ameasa mundu tomak, Kalbuadi semo ona ba Australia, no to’o ohin loron, maske Timor-oan sira tama no sai, maibé Kalbuadi seidauk iha interese atu fila mai TL hodi hasoru justisa.

Prokuardór Jerál Repúblika (PJR) José da Costa Ximenes informa, MP finaliza ona ninia akuzasaun hasoru Kalbuadi no entrega ona akuzasaun refere ba tribunal.

“Hanesan horibainhira ha’u dehan tiha ona, ami akuza tiha ona, prosesu tuir mai bele ba konfirma iha tribunál,” deklara PJR José ba jornalista sira hafoin enkontru mensál ho Prezidente Repúblilka Francisco Guterres Lú Olo iha Palasiu Prezidensiál, Bairu-Pite, Tersa (18/08).

Molok ne’e, PJR informa, MP laiha koñesimentu ba Kalbudi bainhira atu ba rai li’ur.

José dehan, MP foin simu justifikasaun kona-ba Kalbuadi ba rai li’ur bainhira Sekjer CNRT ne’e iha ona Australia.

“Felismente bainhira ami simu Kalbuadi Lay ninia justifikasaun nia iha tiha estranjeiru mak halo justifikasaun mai.”

“Iha tiha estranjeiru mak iha fali justifikasaun ida mai, ne’ebé agora dadaun Kalbuadi iha Australia. Agora dadaun ami-nia ekipa Prokuradór Titular ho prosesu ida ne’e ánaliza situasaun ida ne’e,” dehan nia.

Iha 21 Jullu, hafoin hasoru PR Lú Olo, PJR informa katak, ekipa prokuradór titular finaliza tiha ona akuzasaun, maibé hela pontu balun, maibé PJR seidauk bele fó informasaun detallu.

“Prosesu agora dadauk Prokuradór Titular, ha’u dehan ona Prokuradór Titular haree hela akuzasaun, finaliza tiha ona, maibé ami haree hela pontus balun, ne’ebé ha’u seidauk bele fó informasaun detallu. Iha momentu propriu ha’u sei ko’alia kona-ba kestaun ida ne’e,” dehan nia iha momentu ne’ebá.

Ba kestaun ne’e, Kalbuadi nia defeza, Fernando Carvalho hatete, Kalbuadi daudaun ne’e iha hela Melbourne, Australia tanba asuntu saude.

“Nia intensaun ba ne’e ba semana ida ka rua nia fila-fali mai Timor, tanba  agora dadaun ne’e nia sei iha prosesu TIR nia laran, kuandu iha dentro prazu (loron) 14 nia laran, nia bele husu lisensa ba MP,” dehan nia.

Maibé, nia dehan, hafoin to’o iha Australia pandemia Covid-19 hahú mosu no nasaun barak, inklui Australia no Timor-Leste, deside taka fonteira ho nune’e difikulta nia fila mai TL.

Nia esplika, ninia kliente la presiza autorizasaun husi MP bainhira hakarak sai ba rai li’ur, importante labele liu loron 14.

“Ha’u rasik nu’udar defeza halo karta ida, kuandu nia (Kalbuadi) fila husi Australia nia bele ba presta deklarasaun iha Ministériu Públiku,” dehan nia.

Entretantu, Kalbuadi hetan TIR husi tribunal tanba deskonfia komete kazu partisipasaun ekonomia no negosiu, brankamentus kapitais, no burla agravadu.