Tuir dadus balun ne’ebé sirkula iha media sosial kona-ba rezolusaun PN nú.2/2008, Lejislatura Daruak kona-ba atribuisaun regalias ba deputadu sira, ne’ebé kada deputadu simu, hanesan subsidiu ba alozamentu kada fulan $450, tratamentu saúde kada tinan $4,000, asina lista prezensa $10 kada loron, saldu telefone $300 kada fulan, kombustivel $400 kada fulan, no subsidiu resesu $2,000 kada tinan.

Signifika, ho deputadu na’in 65, PN aloka $29,250 ba alozamentu kada fulan, ba tratamentu saúde $260,000 kada tinan, ba asina lista prezensa $17,550 kada fulan, ba saldu telefone $19,500 kada fulan, ba kombustivel $26,000 kada fulan, no ba subsidiu resesu $130,000 kada tinan.

Ho regalias ba Deputadu sira, veteranu sira mós ezijé atu halo tratamentu hanesan ou liu tanba sira halo funu durante tinan 24 ba ukun rasik an.

Xefe Estadu Maior Jerál Falintil Forsa Defeza Timor-Leste (FF-DTL), Maijór Jeneral Lere Anan Timur hatete, presiza kria lei ida hodi garante veteranu sira nia futuru.

Tuir Lere, regalias no pensaun vitalisia ne’ebé deputadu sira hetan hamosu injustisa boot, tanba veteranus ne’ebé funu durante tinan 24 laiha direitu, maibé deputadu ne’ebé tinan lima (5) ka tinan tolu (3) de’it tuur iha PN hetan direitu ne’ebé boot liu.

“Ita terus iha terus nian leten, ida ne’e injustisa boot. Deputadu iha pensaun vitalisia, karreta kada tinan lima troka, enkuantu veteranus sira laiha, ida ne’e halo ita-nia fuan kanek,” dehan Lere iha Kuartél Jeneral F-FDTL, Fatuhada, Dili, Tersa (18/08).

Maske fuan kanek, maibé Lere nafatin iha esperansa katak Konsellu Nasional Kombatentes ba Libertasaun Nasional no Ministériu Asuntu Kombatentes no Libertasaun Nasionál, sei buka solusaun hodi rezolve problema ne’e.

“Ha’u hatete ba Ministériu Veteranus no Konselu Veteranus katak ‘imi agora buka identifika problemas no fó solusaun,” dehan nia.

Molok ne’e, Prezidente Parlamentu Nasionál Aniceto Guterres fó sai kona-ba montante subsidiu ba deputadu sira ne’ebé hanaran subsidiu alozamentu.

“Imi hakarak hatene, deputadu ne’e ida-ida fulan ida simu subsidiu ba alozamentu $450, tinan ida deputadu ne’e simu hira? $5,400 deputadu ida. Se 65 deputadus, osan hira mak sai ona só ba subsidiu alozamentu?, depois osan ne’e nia gasta duni ka la’e? balun nia iha uma di’ak mós nia simu nafatin tanba ne’e subsidiu,” dehan Aniceto relasiona ho kritika husi sosiadade kona-ba planu PN atu harii edifisiu foun no uma ba deputadu sira iha Hera.