Xefe Departamentu Kontrolu Kualidade no Komunikasaun, HNGV, Sara Xavier informa, iha fulan Jullu, inan sira ne’ebé partu iha sala maternidade HNGV hamutuk na’in 499 no bebé na’in 505 mak moris.

“Durante fulan Jullu, bebé na’in 505 mak moris, kompostu husi mane na’in 248 no feto na’in 257, na’in 6 mak kaduak, no na’in 8 mak mate,” informa Sara iha HNGV, Bidau, Tersa (18/08).

Kona-ba bebé ne’ebé mate, nia hatete, maioria mate iha inan nia kabun laran, tanba sofre komplikasaun no mós hipertensaun.

Tan ne’e, nia husu ba inan sira ne’ebé mak isin-rua atu tenke halo vizilansia beibeik iha fasilidade saúde sira ne’ebé mak besik, nune’e bele hatene bebé sira-nia dezenvolvimentu no kresimentu iha inan nia kabun.

Entretantu, tuir dadus, hahú husi Janeiru to’o Agostu 2020, inan na’in 3.459 mak baixa iha maternidade, na’in 3.396 mak hahoris bebé na’in 3.433, bebé na’in 80 kaduak no na’in 60 mak mate.