Peskizadór AJAR, Inocencio de Jesus Xavier hatete, buat ida di'ak mak ne'e, to'o loron sesta ona karreta no motor estadu para tiha kantor, exeptu karreta operasionál, iha viajen sira ba munisípiu mak uza ba tanba iha giua marsa.
Nia hatete, karreta no motor estadu barabarak di'ak liu sesta ne'e para tiha iha kantor no funsionáriu sira ne'e tenke hatene moe uitoan ba, diretór sira hanesan ema matenek, ema kompriende lei ida ne'ebé di'ak no la di'ak imi hatene, ida ne'ebé imi nian, ida ne'ebé patrimóniu estadu ne'e labele karreta estadu ne'e tula malu tun, sa'e konsiénsia utilizadór ne'e.
"Ba KAK, Inspetór Jerál Patrimóniu, Komisaun Funsaun Públiku, ho Provedoria Direitu Humanus no Justisa kontinua halo servisu apoiu polísia tranzitu atu bele tau matan ba viatura estadu sira ne'e hahú husi motorizada to'o karreta ne'ebé viajen loron Sexta no Domingu faramais loron feriadu sira kontinua halo kontrolu se la'e sira uza tuir sira nia hakarak, nune'e bele poupa ita nia osan," dehan Inocencio iha knaar fatin, Faról, Sesta (21/6).
Nia afirma, se la sala VIII governu nia tempu apoiu tiha ona subsidiu transporte ba sira, tanbsá mak lori nafatin karreta no motor estadu ba uma.
Entretantu, iha fatin ketak Diretór Ezekutivu FONGTIL, Valentim da Costa Pinto 'Koko' hatete, prátika balun loos ne'e hatudu ona iha governasaun sesante ne'ebé ekipa konjunta mai husi instituisaun PDHJ, KAK, polísia tranzitu ne'ebé halo cek point ba kada loron la'ós loron servisu, loron Sexta to'o Domingu ka loron ferias nasionál ruma ne'ebé atu evita funsionáriu ne'ebé bele uza patrimóniu estadu hodi responde ba ninia interese pesoal sira.
"Tanba prátiku sira ne'e bainhira akontese beibeik mak fó prejuizu ba ita nia despeza estadu nian, ida ne'e prátiku mas to'o agora tinan ida mai ami hare katak buat ruma ne'ebé la kontinua akontese ba ezemplu servisu balun ne'ebé uluk halo tiha ona. Ami rekomenda katak presiza halo ida hanesan ne'e ita bele kontinua tau atensaun kona-ba jestaun patrimóniu estadu no mós kona-ba jestaun finansas públika bele la'o ho di'ak," tenik nia.
