Iha regra foun ne’ebé Autoridade Munisipiu Dili (AMD) prepara ne’e, sei regula mós kona-ba medida ba rate iha semiteriu sira iha munisipiu Dili.
Prezidente Autoridade Munisípiu Dili, Gregorio Saldanha ‘Mouris’ hatete, daudaun ne’e AMD prepara hela regulamentu ba familia sira bainhira atu hakoi sira-nia membru ne’ebé lakon vida.
"Regulamentu sira ne'e mak hanesan medida bainhira hakoin mate, rate nia medida hotu tenke hanesan, labele balun andar no balun baibain," dehan Mouris ba Jornalista sira, iha Tasi-Tolu, Sesta (21/06).
Maibé, nia hatutan, regulamentu sira ne'e AMD sei prepara hela, no bainhira finaliza ona sei fó sai ba públiku.
Aleinde kona-ba regra, nia hatutan, AMD mós sei sobu rate 50 iha area Santa Kruz, iha kapela Pai Nosso nia sorin, tanba taka dalan.
"Ami mós fó sai ona avizu, sira nian família hakoin iha dalan atu mai tuur hamutuk ho ami par koalia hamamuk dalan, sira lori ba tau iha osoariu atu nune'e dalan nakloke ba hodi la'o" Nia relata
Kona-ba alargamentu rate Bekusse, nia dehan, prosesu estende no haluan rate Bekusse dadaun ne’e atinze ona 90%.
"Ita hein tan 10% atu termina ona rate ne'e no ita hotu hein nia rezultadu."
Rai ba alargamentu rate Bekusse ne'e, nia dehan, ho medida 1.400 metru kuadradu, ho orsamentu $309,409.28, no implementa husi kompaña Gaerenez Unipessoal.Lda.
