Reprezentante Juventude Katólika, Cristalina Correia hatete, ba sedu tanba laran kontente hakarak hasoru Papa Francisco.
"Ami hein ho kontente tebes hodi hein prezensa Sua Santidade Papa nia prezensa iha ne'e. Nia sei hasoru malu ho ami hodi ko'alia ho ami tanba ne'e ami kontente tanba bele hasoru direita São Pedro nia saseluk ne'e no hetan mós mensajen furak hosi nia hodi moris tuir nu'udar joven Timor oan ne'ebé nakonu ho espíritu domin," dehan Cristalina Correia, iha CCD, kuarta ne'e.
Nia hatutan, prezensa Sua Santidade Papa ne'e hametin liután fiar Katólika, tanba santu padre líder katóliku mundiál ida ne'ebé simplesidade hakraik-aan no la halo diskriminasaun ba ema hotu.
Reprezentante Juventude hosi Diocese Dili, Gregório Guterres, mós manifesta nia sentimentu ho emosionál katak prezensa Sua Santidade Papa Francisco iha Timor-Leste ne'e lori bensaun ba paz no ksolok nian.
" Ha'u sente kontente no orgullu tanba hanesan jerasaun foun foin primeira vez hetan Papa Francisco nia oin. Nakonu ho esperansa katak prezensa Papa nia ne'e lori bensaun ne'ebé úniku mai ita Timor-Leste, tanba ne'e nu'udár joven ha'u kontente no la sente kolen mezmu mai madrugada, " dehan nia.
Nia hatutan, buat ida ne'ebé ita aprende husi Sua Santidade Papa nia vizita ne'e mak ninia simplesidade no hakraik-aan ne'e.
"Ninia karakter ida-ne'e mak bele hametin liután ami-nia fiar no ida-ne'e ita sarani hotu-hotu presija banati tuir," nia apresia.
Entretantu iha sorumutu joventude ho sua santidade Papa Francisco ne'e Joven na'in-haat, reprezenta husi dioseze tolu, Baucau, Dili no Maliana, no musulmanu ida preparadu atu fó sasin ba Papa Francisco kona-ba dokumentu haat mak hanesan Laudato Si, Fraterlli Tutti, Amoris Laetitia no Christus Vivit.
Foinsa'e na'in-haat ne'ebé sei fó testemuña ba dokumentu sira ne'e ho lian portugés. No kada ema nia ida sei hato'o testemuña ba dokumentu sira ne'e minutu ida-resin.
Tuir observasaun jornalista iha terenu, Sua Santidade Papa Francisco ninia prezensa iha CCD ne'e iha tuku 09h30, maibé joventude rihun 3 ne'e tama iha CCD iha tuku 4 madrugada. Sira hotu haksolok no hananu hamutuk hodi hein Papa nia prezensa.
