Tanba, durante ne’e, públiku preokupa joven mak autór ba krime, tanba ne’e prezensa Papa Franscisco nia vizita mai Timot-Leste ne’e hakarak transforma joven sai autór ba unidade no páz.
"Durante ne'e ema hotu-hotu sempre dehan katak joven mak autór ba krime, maibé iha vizita sua santidade Papa Francisco nia iha TL ne'e ha'u fiar katak joven sei sai autór ba unidade no paz iha nia rai rasik," nia dehan iha CCD, kuarta (11/09).
Nia hatutan, tanba prezensa Papa nia ne'e, hakarak fó mensajen furak tebes ba Timor-oan hotu no fó bensaun wain ne'ebé haforsa tebes espíritu juventude nia atu moris ho di'ak liután ba oin.
"Papa ninia prezensa ne'e fo mensajen ne'ebé furak tebes ba ita Timor oan hotu, no Papa ninia prezensa ne'e mós nia haraik bensaun ne'ebé nakonu ho espíritu domin no paz nia, ho ida-ne'e mak ha'u fiar katak joventude sira hotu sei moris tuir mensajen furak hotu ne'ebé sua santidade Papa husik hela mai ita", nia dehan.
Nia hatutan, nu'udar joven ida ne'ebé foinsa'e presija aprende no moris tuir sua santidade papa Francisco ninia simplesidade no hakraik an ne'e.
"Nu'udar joven ida ne'ebé foinsa'e no futuru nasaun ida-ne'e nia, presija aprende no moris tuir karakter sua santidade Papa nia, tanba Papa nia karakter ida-ne'e mak bele hametin liután sarani katólika nia fiar iha mundu liuliu iha TL," nia hatutan.
