Joven Mate Iha Sela, KOMJER Suspende Membru Komandu PNTL Dili Na’in Ualu Featured

By Setembru 05, 2022 8852
Portavoz PNTL, Superinetendente Xefe Polisia, Armando Monteriro. Foto:Dok/INDEPENDENTE. Portavoz PNTL, Superinetendente Xefe Polisia, Armando Monteriro. Foto:Dok/INDEPENDENTE.

DILI: Relasiona ho kazu joven ida ne’ebé deskonfia tara-aan iha sela detensaun Komando Polisia Nasional Timor-Leste, Munisipiu Dili, Komandu Jeral Polisia Nasional Timor Leste foti medida suspende membru polisia na’in valu (8).

Nune’e, tuir evidensia hirak ne’ebé parte ekipa ivestigador rekolla, iha indisius balun mosu kona ba matebian nia mate.
Tuir Komunkadu ne’ebé Online INDEPENDENTE, asesu, kinta ne’e, katak, husi akontesimentu kazu ne’e, iha tuku loron 01 fulan-Setembru, iha 19:25, Komandante Komando PNTL Munisipiu Dili ho nia estrutura halo kedan reuniaun ida ho Xefe Servisu Investigasaun Kriminal PNTL, Superinetendente Jorge Monteriro ho nia ekipa, Prokurador Distrital Dili, Dr.Jacinto Babo, Defensor Publiku Dr. José Telo S. Cristovão, PDHJ, Sosiedade Sivil no reprezentante husi Organizasaun PSHT, Dr. Pedro Aparicio.
Nune’e, rezultadu husi reuniaun ne’e iha konkordansia kria ekipa investigasaun konjunta external no internal PNTL nian, ne’ebé hahú hala’o ona servisu iha loron akontesementu ne’e.
Ho nune’e, iha loron 02 fulan-Setembru 2022, oras tuku 008:30, Servisu Investigasaun Kriminal PNTL halo pedidu outopsia ba Ministeriu Publiku hodi hetan despaixu outopsia.
Enkuantu, bazeia reuniaun konkordansia iha Komando PNTL Munisipiu Dili atu garante professional, transparansia no akuntabilidade nian mak, iha tuku 14:00 PSIC no mediku patolojia husi HNGV Dili mak halo rekonstrusaun lokal ba krime.
Aleinde, iha loron 03 Setembru 2022, iha tuku 16:00 otl, PSIC ho mediku patolojia mak halo outopsia ba vitima iha sala mortuariu HNGV Dili.
Molok ne’e, iha loron 2 fulan-Setembru mós, Komandante Jeral PNTL, hasai despaixu urjenti no 365/CG-PNTL/IX/2022, nomeia ofisial PNTL nain haat (4), hodi halo investigasaun internal ba kazu ida ne’e.
Tanba ne’e, Komandante Jeral Polisia Nasional Timo-Leste, foti medida kautelares hodi fó suspensaun preventive durasaun loron 60 ba membru Komando PNTL Munisipiu Dili na’in ualu (8).
“Ohin loron 05 fulan-Setembru 2022, Komando Jeral PNTL, foti medida kautelares hodi fó suspensaun ba durante loron 60 ba membru Komando PNTL Munisipiu Dili na’in 8, kompostu husi Ofisial na’in 3, Sargentu na’in ida no Agente na’in 4, hodi submete ba prosesu investigasaun disiplinar no criminal,”dehan Portavoz PNTL, Superinetendente Xefe Polisia, Armando Monteriro, iha komunikadu, kinta ne’e (05/09).
Entretantu, naran membru Komando PNTL Munisipiu Dili na’in 8 mak hanesan,-Inspector Antonio Soares- As (Ofisial Dia), Inspector Mariano Soares-MS (Chefe SIK), Inspector Anita Quadros- AQ ( Adjunta SIK), S/C Lino Sarmento-Ls (Chefe Sek Detensaun), A/C Thomas Vieigas-TV (Pikete funsaun), A/C Francisco Amaral de Andrade-FADA (Pikete funsaun), A/P Agustino Afonso Magno-AAM (Investigador) no A/P Thomas do Carmo Punef-TDCP(Investigador).
Tanba ne’e, Komando Jeral PNTL husu nafatin ba sidadaun Timoroan sira hotu atu labele monu ba manibra individu ou grupu balun ne’ebé mak lansa propaganda oi-oin iha media sosial.
“Hamutuk ita kria paz, unidade amizade no promove ita nia identidade, kultura, hodi kontribui ba estabilidade, seguransa no dezenvolvimentu nasional”.

Rate this item
(2 votes)
Saturnina da Costa

Jornalista Jornal Independente

https://independente.tl

Independente Digital TV