Hafoin iha tinan 500, relijiaun katolika harii iha Timor-Leste.
Nune’e, hanesan orgullu no onradu bo’ot ida ba sarani no povu tanba Amu Papa bele hili bibi atan ida sai hanesan Kardeál.
Padre Ernerstu haktuir, sarani sira keta haluha mós istória iha loron 12 fulan-Outubru 1989, bainhira Amu Papa João Paulo Segundu vizita TL ba dahuluk. Iha ne’ebé nia hatete ba sarani sira katak, imi mak masin no naroman ba mundu.
Nune’e, mós Amu Papa João Paulo dehan, se laos imi se tan, se la'ós ohin bainhira tan.
"Ha'u hanoin, ohin istória ida ne'e sai fila fali realidade ida, to'o ikus santa kreda universal, Amu Papa Francisco hili ita nia bibi atan di'ak ida sai hanesan Kardeál,”dehan nia ba jornalista hafoin simu Sua Eminência Reverendíssima Kardeál Dom Virgílio do Carmo da Silva, iha Aeroportu Internasionál Nikolau Lobato, segunda (05/09).
Padre ne’e hatutan, atu sai bibi atan ne’ebé diak, lalika orgullu demais no labele hatudu katak, to'o ona ksolok lolos. Tanba ohin loron la'ós ko'alia kona-ba kuantidade, no estabilidade iha Timor-Leste, maibé oinsá haree ona kualidade fiar no domin hodi sai masin no naroman ba mundu.
"Ha'u hanoin buat ida ne'ebé interesante tebe-tebes mak ema hotu-hotu entuiziasmu, ksolok no kontente simu ninia bibi atan ida ne'e," dehan nia.
Padre Ernetu haktuir, esperansa ba sarani hotu iha futuru mak, mai hamutuk lori uma kreda no nasaun ida ne'e ba oin.
Iha fatin hanesan, reprezentante sarani Katolika Orlando Alves, hateten, prezensa Kardeál nian ne'e hanesan milagre ida ba povu Timor-Leste.
"Sarani hotu hakilar viva Amo Kardeál ne'e, lori haksolok bo'ot, tanba milagre ida bo’ot mak Na’in Maromak hili ema dahuluk, sai Kardeál,” nia dehan.
Entretantu, Sua Eminência Reverendíssima Kardeál Dom Virgílio do Carmo da Silva, hetan ordesaun iha loron 27 fulan-Agostus 2022, iha Vatikanu, Roma.
Nune’e, iha loron 05 Setembru 2022, Sua Eminência Reverendíssima Kardeál Dom Virgílio do Carmo da Silva, fila hikas mai Timor-Leste.
Ho nune’e, tuir orariu, misa agradesemntu ba Sua Eminência Reverendíssima Kardeál Dom Virgílio do Carmo da Silva, sei hala’o iha Uma Adat, Tasi-Tolu, iha tuku 04:00 lokraik, orsa Timor-Leste.
