Enkuantu, Jorge Serrano eleitu hafoin halakon Lourenço Oliveira iha eleisaun ba orgaun ezekutivu CCI-TL ho totál delegadu ne’ebé rejista hamutuk 264 no delegadu ne’ebé tuir votasaun hamutuk 260.

Ho nune’e, rezultadu votasaun, Jorge M. Araujo Serrano hetan votus hamutuk 151 no Lourenço Oliveira hetan votus 109.

Tanba ne’e, Kandidatu prezidente CCI-TL ba períodu 2022-2026, Jorge Serrano iha Pakote A no hetan apoiu husi proponente sira iha munisipiu sia (9) no asosiasaun membru sira hamutuk 14.

Aleinde, Kandidatu Lourenço Oliveira iha Pakote B no propoin husi munisipiu ualu (8) no asosiasaun membru sira hamutuk neen (6).

Entretantu, haree ba lista kandidatura ne’ebé proponente sira aprezenta, ekipa jurídiku halo verifikasaun no halo aprovasaun bazeia ba Artigo 27 nú 3 husi estatutu CCI-TL ne’ebé relata, kandidatu CCI-TL tenki aprezenta no asina husi membru minimu na’in sanulu (10), asosiasaun fundador hamutuk lima (5), CCI-M hamutuk tolu (3), inklui Rejiaun Administrativu Espesial Oekuse Ambeno (RAEOA), ne’ebé partisipa iha Asembleia Jeral ne’e.

Entretantu, molok atu tama ba iha eleisaun, Jorge Serrano, hatete, iha CCI-TL kada tinan haat membru sira sempre hasoru malu iha Asembleia Jerál, tanba  servisu iha negósiu, hanesan responsabilidade bo’ot ida.

Nune’e, husi negosiu ne’e motiva nia atu kandidata aan hodi hatan ba nesesidade organizasaun nian no instituisaun sira nia presiza.

Nia hatutan, bainhira kandidatura la reprezenta nia aan, maibé reprezenta membru hotu ne’ebé hamahan aan iha CCI-TL.

Tuir nia desizaun iha CCI-TL koletiva membru hotu nian.

“Iha kongresu ida ne’e ha’u mai ho konseitu ida katak se lakon ita hotu lakon no manan ita hotu manan, maibé ha’u hakarak kongresu ne’e hotu, kongresu ida ne’ebé halo ita hotu solidu, CCI ida de’it, CCI ba hotu-hotu no la esklui ema ida tanba ha’u nia objetivu prinsipál mak CCI-TL tenke forte, reprezentativu no mós akumulativu,” nia dehan.

Ho nune’e, misaun importante ne’ebé nia iha mak atu haforsa CCI-TL liu husi organizasaun tuir lema ne’ebé hatete, organizar para desenvolver.

Nune’e, ba futuru nia promote atu hahú organiza hikas CCI-TL husi asosiasaun no membru sira ba to’o iha CCI munisipiu, atu nune’e funsionanamentu CCI-TL hanesan organizasaun no instituisaun ne’ebé funsiona ho di’ak hodi garante moris diak CCI-TL nian.

“Ha’u nia planu atu iha fulan neen dahuluk ne’e bele konsolida CCI-TL, atu atualiza situasaun real ne’ebé enfrenta hela problema, nune’e konsolida hahu husi Akait, ha’u hakarak asosiasaun membru hotu nia bandeira iha Akait,” nia dehan.

Nia akresenta, Sede Sentral CCI-TL Akait tenke sai fatin ida ba emprezáriu hotu atu iha diálogu, fahe informasaun, halo advokasia no promove vida emprezariál.

Aleinde, nia promete mós bainhira eleitu, sei instala baze dadus ida CCI-TL nian atu bele iha kontrolu ba servisu no aktividade hotu husi membru sira nian nudar meius ida atu rejista forsa CCI-TL nian.

“Baze dadus ne’e nia objetivu atu hatene total empreza iha munisipiu hira? hahú husi pequena empreza, media emprezas no grande empreza hira no sira nia servisu kobre deit iha area saida,”haktuir nia.

Politikamente, TL tama ona iha ASEAN, tan ne’e tenke prepara aan iha setor hotu, hanesan iha área peska, pekuaria, agrikultura atu prepara sertifikadu ne’ebé kualidade ba produtu hodi hatan ba merkadu internasionál liu husi exportasaun.