Prezidente Repúblika Indonézia, Joko Widodo agradese bele hasoru malu no kongratula Kay Rala Xanana Gusmao no membru tomak ne’ebé eleitu iha eleisaun demokratiku no simu posse foin lalais.
“Benvindu exelensia Primeiru Ministru Xanana Gusmão ho delegasaun ministru sira hotu, no parabéns ba exelensia ba pose foin lalais ne’e. Indonézia no Timor-Leste nasaun maun alin, nune’e ita nia kooperasaun tenki hametin liu tán. Ha’u hakarak informa asuntu tolu, primeiru kona-ba Timor-Leste sai membru iha ASEAN, Indonézia sempre ajuda no aplikasaun Timor-Leste atu sai membru no kapasitasaun rekursu umanus ba membru governu sira ne’e importante,” dehan Komunikadu ne'ebé Jornalista Independente asesu iha mídia Gabinete PM, Tersa (05/09).
Haktuir komunikadu Prezidente Jokowi dehan, Indonézia no Timor-Leste sei kontinua servisu hamutuk hodi ajuda rekursu umanu no setór ekonomia no dezenvolvimentu infraestrutura Timor-Leste.
Iha fatin hanesan, PM Xanana hato’o uluk obrigado barak ba Prezidente Joko Widodo hodi konvida nia partisipa iha forum Association of Southeast Asian Nation (ASEAN) Business & Investment Summit 2023 ba dala-43 iha Jakarta-Indonézia.
“Ha’u hato’o obrigado barak ba exelensia fó konvite ne’e mai ha’u, ha’u orgullu tebes, hanesan prezidente dehan loos, ita maun alin no atendimentu durante ne’e di’ak tebes,ita hanoin katak, ida ne’e tenki metin liután,” dehan Komunikadu.
Xefe Governu kontraula Estadu Indonézia ne’ebé sai uma na’in hodi organiza forum ASEAN Business & Investment Summit ne’ebé konvida xefe estadu no xefe governu nasaun 26 inklui Timor-Leste hola parte nu’udar obserbador atu bele aprende matenek hosi nasaun membru sira.
PM Xanana to'o Palasiu Presidente Indonézia simu ho parada militár kontinua kedas ba sala’o hasai fotografia no asina livru de onra hodi kontinua hala’o kedas enkontru bilteràl.
Vizita PM Xanana akompaña direita hosi Vise Primeiru-Ministru no Ministru Koordenador ba Asuntu Ekonomiku, Ministru Turizmu no Ambiente, Fransisco Kalbuadi Lay, Ministru Negosiu Estranejerus no Kooperasaun, Bendito dos Santos Freitas, Ministru Interior, Fransisco Guterres, no Sekretaria Estadu Asuntu ASEAN, Milena Rangel, enkuandu PR Jokowi akompaña hosi Ministra Negosiu Estranjerus, Retno Lestari Prinsari Marsudi, Sekretaria Gabinete, Pramono Anung, Menki Polhukmam, Mahfud MD, no Ministru Agrikultura, Syahrul Yasin Limpo.
