Nuudar negosiante iha merkadu Aimutin, Jacob Alves Perreira sente triste ho desizaun governu neebé kontinua taka dalan ba sira hodi buka osan sustenta nesesidade familia.

"Ami nia moris maka hanesan ne'e ona, ida-idak buka osan hodi sustenta nesesidade uma laran. Povu nia vida moris la hanesan ho membru governu no Deputadu sira iha Parlamentu Nasional, neebé tinan-tinan tuur deit hodi simu osan,” dehan Jacob Alves Perreira iha ninia faan fatin Aimutin, horseik.

Nia esplika, situasaun ne'e bandu komunidade sira labele halo movimentu, entaun sira nia produtu barak maka at hotu no soe estraga de'it, maibé governu nunka toma atensaun ba problema neebé povu enfranta.

iha situasaun normal sira nia modo folin diak no kada loron bele osan too $ 20 ba leten, maibé impaktu husi pandemia Covid-19 neebé obriga governu taka dalan, entaun kada loron hetan deit $ 2 resin.

Entretantu, Negosiante merkadu Manleuana, Rui Acacio Freitas hateten, konfinamentu obrigatoriu nee halo sira nia sira nia rendimentu tun, tanba ema la halo movimentu hodi sosa sira nia produtu.

“Situasaun ida nee halo ami nia rendimentu menus, nee duni ami sente triste, tanba laiha osan hodi sustenta nesesidade familia. Ita nia governu mós too nunka fó apoiu ruma ba povu kiik sira,” tenik nia

Ho preokupasaun hirak ne'e, nia parte husu ba governu tenke tetu halo didiak molok foti desizaun ruma, tanba situasaun.